Isikkamik arsarneq: Iligiiaat arfineq-pingasut pissartanngorniunnissamut piareerput, kisianni...
Isikkamik arsarnermi angutit pissartanngorniunnissaannut anngunniunnerit sapaatiummat naammassineqarput, annguttullu iligiiaat arfineq-pingasuusut nassaarineqarsimalerlutik. Nunatsinnili pissartanngorniunnerit naammassineqassanersut qularnarluinnarpoq, coronami pissutigalugu suli killilersuisoqarpoq.
Angutit isikkamik arsarlutik pissartanngorniunneri Ilulissani augustimi ingerlanneqartussatut pilersaarutaapput.
Oqartussallu katersuunnissamut killilersuineri malillugit, kommunit killii aallaavigalugit anngunniuttoqarpoq.
Uku anngupput:
- N-48 - Avannaata Kommunia (hjemmeholdet)
- FC Malamuk – Avannaata Kommunia
- G-44 – Kommune Qeqertalik
- FC Aqisseq – Kommune Qeqertalik
- Aqissiaq – Qeqqata Kommunia
- B-67 – Kommuneqarfik Sermersooq
- IT-79 – Kommuneqarfik Sermersooq
- Eqaluk-54 – Kommune Kujalleq
Pissartanngorniuttoqassanersorli suli qularnarpoq. Katersuunnissamummi killilersuineq 31. december 2020-mut sivitsorneqarpoq.
- Matumuuna nalunaarutigissavarput Namminersorlutik Oqartussat nalunaarutaat juulip 16-ianni saqqummiunneqartoq malillugu kommunikkaartumik aaqqissuussisoqarsinnaanera decembarip 31-iata tungaanut sivitsorneqarmat. Tamanna nuna tamakkerlugu pissartanngorniuttoqarsinnaannginneranik isumaqarpoq, KAK, Kalaallit Arsartartut Kattuffiat, Facebookimini ataasinngornermi ilisimatitsivoq.
KAK-ili periarfissanik misissuilluni Namminersorlutik Oqartussanik oqaloqatiserinnikkumavoq, ilaasortanut naammaginartumik angusaqarumalluni.
- KAK-mi siulersuisut periarfissanik misissuileruttorput. Ullunilu qaninnerni erseqqinnerusumik nalunaaruteqarsinnaalerpata nalunaaruteqassaagut, KAK ilisimatitsivoq.
Katersuunnissamut killiliinerit malillugit silami aaqqissuussani inuit katersuussinnaasut amerlanerpaamik 250-iusinnaapput, illup iluanilu aaqqissuussani inuit amerlanerpaamik 100-t katersuussinnaallutik.
Katersuussinnaanermut killilersuutit ukiup naanissaanut sivitsorneqarput, coronavirusillu Kalaallit Nunaanni tunillaassunnginnissaanut illersueqataassallutik.