Isikkamik arsaannermi anngunniunnermi dommeri siorasaarneqartoq

Nagtoralik Paamiuneersumi arsaattartut marluk anisinneqarput, unamminerullu naammassilernerani aamma isertitsigaluaramik atortussaatinneqarnani. Tamanna nunatta kujataani isikkamik arsaannermi GM-imut anngunniunnermi Qaqortumi ingerlanneqartumi pisut ilaat. Unammineq naammassineqarmat unamminermi dommeriusoq Isak Frederiksen Narsameersoq unatarneqarnissamik siorasaarneqarpoq.

Nagtoralik Paamiuneersoq kiisalu Eqaluk 54 Tasiusameersut unammineranni Eqaluk 54 2-1-mik ajugaavoq. Nagtoralimmi unammisartut marluk unamminermi anisinneqarput, unamminerullu naammassilernerani Nagtoralik isertitsigaluarmat dommerimit atortussaatinneqarnani.

Kukkusoqartoq
- Isertinneqartoq siullermik akuerigakku kukkuluttorpunga. Arsaaffik pujoralattorujussuuvoq, pujoralakkunnaariarmallu sisaani dommeri nappaaqqasoq takuara, isertinneqartorlu atortussaajunnaarsippara arsaattoq utaqqinera pissutaalluni. Taamaattumik sisaani dommeriusup aalajangiinera ataqqillugu isertoq atortussaajunnaarsippara, Isak Frederiksen Sermitsiaq.AG-imut oqaluttuarpoq.

Nagtoralimmi unammeqataasut kisimik naammagittaalliunngillat. Siuliani unammipput K-33 Qaqortumeersut aamma N-85 Narsameersut, tassani K-33 6-2-mik ajugaavoq. Eqaluk 54-ip Nagtoraliullu unammineranni naligiissimasuuppata K-33 GM-imut anngunnissamut periarfissagissaalersimassagaluarpoq.

- Arsaattut arsaaffimmut iserput annertuumillu naammagittaalliorlutik, aalajangiinerpulli attatiinnarparput inatsisimmi malippagut. Annersarneqarnissamik siorasaarneqarpunga, Qaqortumiillu qimagunnissara aamma piumasarineqarluni. Kiap siorasaarneraanga ilisimanngilara, Isak Frederiksen oqaluttuarpoq.

Toqutsinissamik siorasaarineq
Qaqortumi isikkamik arsaattoqarnerani aatsaat dommerimik siorasaarisoqanngilaq. Dommeri Ingvar Lundblad arsaattunit isiginnaartumit 1989-imi GM-ertoqarnerani aallaaneqarnissamik siorasaarneqarpoq. Dommeri Daniel Jakobsen ukioq kingulleq GM-ertoqarnerani unatarneqarnissamik aamma siorasaarneqarpoq.

- Qujanartumik siorasaarinerit piviusunngortinneqarneq ajorput. Ullulli ilaanni piviusunngortinneqariataarnissaat aarlerinarsinnaavoq. Taamaattumik taamatut dommerinut pissusilersortarnerit unittariaqarput, tamanna aamma timersoqatigiiffiit oqaluuserisariaqarpaat, Isak Frederiksen oqarpoq.

GM-imut anngunniunnerit ullumi marlunngornermi naggaserneqassapput. K-33 Nagtoralillu unammissapput, Eqaluk 54 N-85-ilu unammissallutik. Nagtorallip arsaattui marluk anisitaasut unamminermi peqataasinnaanngillat.

Qaqortumi pisoq pillugu Sermitsiaq.AG GBU oqaaseqartinniarpaa.

Ataasinngornermi angusat:

• K-33-N-85: 6-2
• Eqaluk 54-Nagtoralik: 2-1

Dommerimik siorasaarisoqarnera tupaallaatigaajuk? Sooruna? Imaluunniit tupaallaatiginngiliuk? Oqallinnermi ataani peqataagit