isikkamik arsaanneq
Isikkamik arsaanneq: Nagtorallip unammisoqaqqinnissaa piumasaqaatigaa
Nagtoraliup unamminermi ilaani isertitsitap atortussaatinneqannginnera pillugu naammagittaalliuuteqarpoq
Nagtoralik Paamiuneersoq Arsaattartut Kattuffiata ataatsimiititaliaanut naammagittaalliuuteqarpoq. Eqaluk 54-imut unamminermi Nagtoralik isertitsigaluarpoq, dommerimiilli atortussaatinneqarnani. Isertoq atortussaatinneqarsimasuuppat kikkut GM-imut anngunnissaannut aalajangiisooratarsimasinnaagaluarpoq.
Eqaluk 54 Tasiusameersoq GM-imut Nuummi ingerlanneqartussamut annguppoq. Anngunniunnermi marloriarlutik naligiipput ataasiarlutillu ajugaallutik. Nagtoralik Eqaluk 54-ilu unammimmata ataasinngormat Nagtoralik isertitsigaluarpoq. Arsaq isertinneqartoq dommerimit akuerineqaraluarpoq, sinaanili dommeri isertoq atortussaatinnagu nappaalluni. Nagtoralimmi arsaattut ilaat utaqqisimanera pissutaalluni isertoq atortussaatinneqanngilaq.
Suliareqqitanngortitsisinnaaneq
Nagtoralik K-33 Qaqortumeersumut unamminermi 2-1-mik ajugaasup arsaattartut kattuffiannut GBU-mut maalaaruteqarpoq. Unammisoqaqqinnissaa piumasaqaatigaat. Nagtoralik Eqaluk 54-ilu unammineranni naligiissimasuuppata Nagtoralik GM-imut anngussimassagaluarpoq, Eqaluk 54-imit isertitaqarneruneq pissutaalluni.
Taamaattumillu Nagtoralik GBU-mi unammiuaartitsinermut udvalgianut naammagittaalliuteqarpoq.
- Unammiuaartitsinermi udvalgip naammagittaalliut itigartippaa, tamanna Nagtoralimmut pingasunngormat nalunaarutigineqarpoq, GBU-p siulittaasua John Thorsen Sermitsiaq.AG-mut oqarpoq.
Nagtorallip itigartitsineq GBU-p amatør- og ordensudvalgianut suliassanngortissinnaavaa.