Skip to main content

Isiginnaartut: Dronningi alutornarluinnarpoq

Dronning Margrethep Nunatta Katersugaasivia sapaammi ullaakkut pulaarpaa. Kingornalu Christian quligata Dronning Alexandrinellu ukiut 100-t matuma siorna tikeraarsimanerannut eqqaaniutaani eqqaaniummik nutaamik uleersilluni.

Dronning Margrethep Nunatta Katersugaasiviani sapaammi ullaakkut nalunaaqutaq 9.30 pulaarnialermat, innuttaasut takunninniaallutik alakkaapput.

Sila nillerpoq, sissaq ulissimalluni, ullororiartulerneranilu anorsarissilerluni.

Aalateriartortut ilaat kalaallit erfalasuannik erfalasoqarput.

Dronningip Nunatta Katersugaasivia pulaareeruniuk eqqaaniummik nutaamik uleersisussaavoq. Christian quligata Dronning Alexandrinellu nunatsinnut tikeraarnerannit ukiut 100-nngorsimaneri malunnartinneqassammat.

Kassaaluk Kristensen

Maja Jensen panialu sisamanik ukiulik, Mia Heilmann, katersugaasiviup eqqaani dronningimut aalateriartorput.

- Dronningi maaniimmat alakkarparput. Meeraallungali nalunngilara dronningeqartoq, aamma panimma maanna nalunngilaa. Tikeraaraangat periarfissaqartilluta aalajateriartortarparput alakkarlugulu, Maja Jensen oqarpoq.

- Aalaterivara. Kisianni massakkut takugunanngilaanga, Mia Heilmann, sisamanik ukiulik oqarpoq.

Kunngeqarfik tamaat ataatsimoortippaa

Naya Juel Pedersen aamma Pia Bloch Spotteck erfalasulerlutik aamma aalajateriartorput.

Pia Block, til venstre og Naya Juel Pedersen er ved nationalmuseet med deres børn.
Kassaaluk Kristensen

- Arnaavoq alutornarluinnartoq. Kunngeqarfik tamaat pillugu ilisimasaqarluartuuvoq, ataasiakkaallu soqutigilluinnarlugit. Soorlu suliffeqarfiit kulturimillu suliaqartut soqutigilluinnarai. Suliffeqarfinnut kulturimillu suliaqartunut qiimmassaalluartuuvoq, soqutigisaqarluartuuneralu nuannerluni, Naya Juel Pedersen oqarpoq.

- Tikeraarnera nuannerluinnarpoq. Ammukarluta qanimut takusarsinnaagatsigu nuannarilluinnarpara. Meeqqagut aamma ilagaagut, nuanneq, Pia Bloch Spotteck Sermitsiaq.AG-mut oqarpoq.

- Kunngikkormiut dronningilu ilaqutariinni ilissinni qanoq isumaqarpat?

- Pingaarutilerujussuuvoq. Kunngikkormiulerituutut imminut taarusuppunga. Inuunerat malinnaavigalugu pissanganarluinnarpoq. Pingaartumik kinguaariit tullii, soorlu kunngissaq ilaqutaalu soqutiginarluinnarput. Aamma qanilaartuunerat uatsitullu ittuunerat nuannerami, Pia Bloch Spotteck oqarpoq.

- Kunngeqarfik tamakkerlugu ataatsimoortippaa, ataatsimooqatigiitsissinnaallutalu. Kunngikkormiut oqaluttuarisaanerat aamma soqutiginarluinnarpoq. Danmarkimut, Nunatsinnut Savalimmiormiunullu isumalerujussuuvoq, Naya Juel Pedersen oqarpoq.

Nunatta Katersugaasiviani pulaareerami dronning Margrethe eqqaaniutip tungaanut pisuttuarpoq. Tassani eqqaaniummik uleersivoq, peqataasinnaaninilu nuannaarutigalugu naatsumik oqaatigalugu.

Kassaaluk Kristensen
               
OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER