Skip to main content

Isiginnaartup sungiusaasoq oqqassaarinerarpaa

Maniitsumi futsalerluni pissartanngorniuttoqarnerani B-67-ip sungiusaasua isiginnaartunut, sungiusaasumut allaallu meeqqanut oqqassaarisoq isumaqarpoq. Sungiusaasup isornartorsiutigineqartut ilisarinnginnerarpai, kisianni sorujussuanngortitsinianngilaq.

Maniitsumi ukiormanna futsalerluni pissartanngorniunnerni pisoq oqallisaangaatsiarpoq. Maanna isiginnaartoq B-67-ip sungiusaasuanut akerliliivoq, unamminerup ingerlanerani kingornalu oqqassaarisimanerarlugu.

- Oqqassaarisorujussuuvoq. Allaat meeqqanut isiginnaartunut, Karl Davidsen pissartanngorniunnerni najuuttoq oqarpoq.

B-67-ip sungiusaasuata, Tekle Ghebrelulip, Kâgssagssuk unammereernerani isiginnaartut akornannit ammip qalipaataa tunngavigalugu nikassaalluni suaartarfigineqrsimanera KNR-ip allaaseraa.

 - Nunatsinni suit? Nunatsinni susassaqanngilluinnarputit. Kalaallit Nunaanniissanngilatit, Kalaallit Nunaanni atorfissaqanngilatit.

Killissamik qaangiisoq
Kisianni Karl Davidsen naapertorlugu Tekle Ghebrelul nammineq pisooqataavoq. Sungiusaasoq killissaminik qaangiisimavoq.

- Taassuma arsartui B-67-it semifinalimi kinguarmata tamanna aallartippoq. Tassani titarnerit killigititat sungiusaasup qaangigassarinngisai qaangerlugit anillappoq. Taliminik ussersorluni isiginnaartut tungaannut oqqassaaraluni pivoq. Isiginnaartunut sakkortuumik pissusilersorpoq, Karl Davidsen oqaluttuarpoq.

- Isiginnaartorpassuillu soorunami kamaatigaat.

Karl Davidsen nangilluni oqaluttuaraa, Tekle Ghebrelulip oqqassaaraluni pissusilersornera unamminerup naammassereernerani nangeqqittoq. Unamminermi Tekle Ghebrelulip sungiusagao B-67 3-2-mik ajugaapput.

- B-67-imi arsartut ilaata aamma Kâgssagssummi sungisaasup (Ole Martinsen, aaqq.) akornanni oqqattoqarpoq. Tekle Ghebrelul oqqattunut ornigutipiloorpoq, Olemullut (Martinsen, aaqq.) oqqassaaraluni. Tassanngaanniik 20 meterit missaanni ungasissusilimmiippunga, Ole ajorsarnerluttuunerarlugu arsarluarnermillu ilinniartariaqartut oqarfigaa, Karl Davidsen oqarpoq.

- Oqqassaarisutut pissuseqarpoq. Tamannalu timersortarfiup qeqqani pivoq.

Unamminerup kingorna meeqqamut ADHD-ertumut eqquisoq
Unaminerup kingorna Karl Davidsen pujortariarluni anillappoq. Tassanngaannaq qanittumik oqqappaluttoqarneranik tusaasaqarpoq. Nipiliortunut orniguppoq, B-67-imilu sungiusaasoq akerleriissutaasoq taanna takoqqippaa.

- Tekle (Ghebrelul, aaqq.) nukappiaqqamut mikisumut qulingiluanik ukiulimmut suanngassivoq. Ingasattunik oqaluppoq.

Qanoq oqarnersoq eqqaamaviuk?

- Aap, kisianni tamakku nipituumik oqaatigisassaanngitsut ilikkarnikuuara, Karl Davidsen oqarpoq.

- Ajorsarnerluttuunerarlugu assigisaanillu oqaluuppaa, Karl Davidsen oqaluttuarpoq.

B-67-ip sungiusaasuata nalusimassagunarpaa, nukappiarannguaq taanna qulingiluanik ukiulik ersinngitsumik  ADHD-mik innarluuteqartoq.

Ammip qalipaataa pillugu nikassaasunik tusagaqanngitsoq
- Taanna ornippara (Tekle Ghebrelul, aaqq.), meeqqanullu taama pisoqarneq ajortoq oqarfigalugu. Taava uannut sakkortusaarluni akulerutissanngitsunga oqarpoq, tamattalu ajorsarnerluttuunerarluta. Eqqissisarniarsarigaluarpara, kisianni piniinnarpoq, minutsillu arlaqanngitsut qaangiummata imminiiginnarlugu ingerlavunga, Karl Davidsen oqarpoq.

Tekle Ghebrelul ammip qalipaataanut tunngasunut nikassarneqarsimalluni nikallungalluni oqaluttuarpoq. Illit tamakkuninnga tusaasaqarpit?

- Naagga. Oqaatigisariaqarpara ulloq naallugu ammip qalipaataa pillugu tassunga nikassaasunik tusagaqanngilanga. Kisianni soorunami uanga peqannginninni taamatut pisoqarsimasinnaavoq, kisianni uanga tamanna tusarfiginngilara, Karl Davidsen oqarpoq.

-Taanna (Tekle Ghebrelul, aaq.) nunani tamalaani unamminermi taamatut pissusilersorsimagaluaruni pinngitsoorani pillaatisisimassagaluarpoq, Karl Davidsen oqarpoq, taassuma ammip qalipaataanik immikkoortitsisuunani naqissuserpaa.

Tamanna ilisarisinnaanngikkaa
Sermitsiaq.AG-p tamanna pillugu Tekle Ghebrelul qanoq oqaasissaqarnersoq attaveqarfigaa.

- Nassuerutigisariaqarpara tamakku pisut ilisarisinnaagukkit ilisarerusukkaluarlugit. Kisianni taamaattoqanngilaq, Tekle Ghebrelul oqarpoq.

- Eqqarsaatigaara tamatta isikkut toqqarluta tamanna oqaloqatigiissutigisinnaassagipput.

Meeqqamut sakkortusaarsimasutit Karl Davidsen oqarpoq?

- Aap, kisianni meeqqat uannut qanoq oqalunnersut naluat. Karl Davidsenillu meeqqap qanoq oqarfigisimaneraanga paaserusunneraa oqarfigigakku nipangeqquinnarpaanga, Tekle Ghebrelul oqarpoq.

Sorujussuanngortinnianngikkaa
Kingorna tamanna sorujussuanngortinneqannginnissaa GBU-mi siulittaasorlu John Thorsenilu oqaloqatigiissutigisimallugu Tekle Ghebrelul oqaluttuarpoq.

- Taakku inuppassuit meeqqallu ammip qalipaataanik aallaaveqartumik nikassaapput, kisianni sorujussuanngortinnissaa ajunngitsumik siunertassaqanngitsoq isumaqarpunga, Tekle Ghebrelul oqarpoq.

Taamaattumillu ilaatigut aamma uunga allaaserinnittumut meeqqat qanoq oqarsimanerat oqaluttuareqqissaarusunngilaa.

- Tamanna sulianngortissanngilarput. Arlaannik eqqunngitsuliortutut isumaqanngilanga. Unammisoqarnera pissutsit sakkortupput. Arsartuma ilaat niaqqumigut tukerneqarpoq, dommerillu ornillugit oqaloqatigiartorakkit isiginnaartut avaallattaarpaannga. Tamanna nuannerpallaanngilaq, B-67-imi sungiusaasoq oqarpoq.

- Kagssagssuup arsarnermi immikkoortortaqarfia sinnerlugu aaqqissuisutut utoqqatsissut. Ajuusaarutigalugu Kagssagssuup arsarnermi immikkoortotaqarfia sinnerlugu tusagassiutinut nalunaarut nassiuttariaqarsimavarput, timersoqatigiiffiup siulittaasuisuini ilaasortaq Niels Rosing taama allappoq.

- Tupaallaqaagut aaqqissuisutut nutaarsiassaq aalassatitsisoq pissusilersuutaasimasut oqaatsillu sakkortuut atorneqarsimanerinut.

Attaveqarfissaq
Sermitsiaq.AG unamminermi isiginnaartunit tusagaqarnissaminut soqutiginnippoq. Qanoq misigisaqarsimanerlutit mailimut lars@sermitsiaq.gl-mut allagit. Mailimi oqarasuaatip normua allassinnaavat.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER