Isiginnaartitsisartutut ilinniarfik qaffanneqarpoq: Akuerisaanissamut misilitsinneq suli akuersissutigineqarsinnaassaaq
Ilinniartut isiginnaartitsisartutut ilinniarfimmut piukkunnaateqarnertik piginnaasatillu tunuliaqutigalugit, akuerisaanissamut misilitsinnermi takutitsinermikkut suli akuerineqarsinnaassapput. Aamma naak ilinniagaq bacheloritut ilinniaganngortinneqaraluartoq. Ilinniakkap qaffanneqarniarneranik suliarujussuusoq, isiginnaartitsisarfimmi pisortaq oqaluttuarpoq.
Nunatsinni isiginnaartitsisartutut ilinniarneq Nunatta Isiginnaartitsisarfiata isumagisaraa, 2020-milu isiginnaartitsisartutut ilinniakkap ukiut marlukkuutaarlugit inuussutissarsiornermik ilinniakkamit ukiunit pingasuni bacheloritut ilinniaganngortinneqarnissaa innersuussuutigaa.
Ilinniarfik nunani tamalaani pitsaassutsinut naleqqutilissaaq, ilinniartullu ilinniaqqinnissamut periarfissarissaarnerulersissavai, qaffanneqarneranut tunngavilersuutit ilaat taamaappoq.
Naalakkersuisut tassunga atatillugu piareersaataasunik suliaqarput. Aammattaaq nalunaarut tusarniaassutigineqarpoq, taannalu aamma isiginnaartitsisartutut ilinniarneq bachelorinngortinneqaraluartoq, ilinniarfik akuerisaanissamut misilitsitsinermigut suli akuersisarnissaanut aqqutissiuissaaq.
Piukkunnaateqarneq piginnaasallu
Inatsit naapertorlugu ilinniartut bacheloritut ilinnialerniarunik nalinginnaasumik ilinniarnertuunngorniarfimmi angusisimanissaat piumasaqaataavoq. Piumasaqaat taanna isiginnaartitsisartutut ilinniarfimmi atuutissanngilaq, tassanilu aamma ilinniakkap qaffanneqarnerata kingorna ilinnialertussat piginnaasaminnik misilitsillutik takutitsisassapput:
- Taamaalilluni isiginnaartitsisartutut bacheloritut ilinniagaqarnissamut qinnuteqartup eqqumiitsuliornermik piginnaasai aalajangiisuusarput, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik, nalunaarummi tusarniuteqartoq allappoq.
Ilinniakkap qaffanneqarnera suliarujussuusoq, isiginnaartitsisarfimmi pisortaq Susanne Andreasen Sermitsiaq.AG-mut oqaluttuarpoq, ilaatigut eqqumiitsuliornikkut bacheloritut ilinniakkani nunatsinni siullersaanera pissutaalluni.
Pisortaq qilanaarpoq
Qaffanneqarnerani inissitassat kingulliit inissinneqarnissaannut taanna qilanaarpoq, kisianni qaqugu pissanersoq suli qulakkeerneqanngilaq.
Taamaammat ukiuni marlunni ilinniakkamut ilinniartunik ukioq manna akuersisoqassaaq, kisianni suna tamarmi inissinneqarnissaa Susanne Andreasenip neriuutigaa, taamaalilluni Nunatta Isiginnaartitsisarfiani isiginnaartitsisartutut ilinniartut bachelorini siullersaassammata.
Piffissami kingullermi kalaallit isiginnaartitsisartut immikkut ukkatarineqarput, filmip 'Ivalu'-p Oscarimut innersuunneqarnikuunera pissutigalugu.