Isiginnaartitsinermi atortut apuunneqarsinnaanngikkallartut
Isiginnaagassiaq nuannarineqarluartoq Juulimaaq - nannullu anersaava Uummannamut tikissimalerpoq, isiginnaartitsinermili atortut suli apuussimanatik. Isiginnaartitsinissaq pingasunngornermut kinguartinneqarpoq.
Sineriak tamakkiusarlugu isiginnaagassiamik Juulimaaq - nannullu anersaavanik isiginnaartitsisut juullimut qilanaartuuteqartitsisaarput.
Uummannamili marlunngornermi unnukkut arfineq-marlup qeqqanut isiginnaartitsinissaagaluaq pingasunngornermut kinguartinneqartariaqalersimavoq, isiginnaartitsinermi atortut illoqarfimmut tikiunneqarsinnaasimanngimmata.
- Atortugut maannakkut Ilulissaniipput, Uummannamullu aqagu (pingasunngornermi, aaqq.) assartorneqassallutik. Atisat atugassagut nassarpagut, pisatalli qulliillu atugassagut amigaatigalugit. Taamaammat illoqarfiup timersortarfiani isiginnaartitsinissaq aqagumut arfineq-marluk qeqqanut kinguartipparput, Manasse Berthelsen, isiginnaartitsinermi aqutsisuusoq oqarpoq.
Juullilernerani inunnik ulikkaarpoq
Juulimaaq - nannullu anersaava Kangaatsiami takutinneqarmat illoqarfimmi innuttaasut affaat isiginnaariarput. Isiginnaagassiap angalatinneqarnerani maannamut inuit 1500-ut isiginnaagassiamik meeqqanik marlunnik, seqinermik innersuarnit tillinneqarsimasumik aallertunik oqaluttuartalimmik isiginnaarsimalerput.
- Iluatsilluartorujussuuvoq. Uummannami isiginnaartitsinissatsinnut qilanaarpugut. Atortutta pingaarnerit assartorneqarnissaannut Air Greenland isumaqatigiissuteqarfigereerparput, apuunneqartullu atorlugit isiginnaartitsiumaarpugut, Manasse Berthelsen oqarpoq.
Atortut Ilulissaniitinneqarallarput Air Greenlandip timmisartua, inunnik juullimut angalasunik ulikkaavissimanera pissutigalugu.