Isiginnaagassiat nutaanngitsut Kalaallit Nunaannut tunngasut digitalinngortinneqassapput

Det Danske Filminstitut kulturministeriaqarfimmiit 2,3 milliuunit koruuninik aningaasannappoq, aningaasallu Kalaallit Nunaannut Issittoq Avannarlermullu tunngasut isiginnaagassiat digitalinngortinneqarnissaannut atorneqassallutik.

Kortfilmen "Ferie i Vestgrønland" fra 1964 er allerede digitaliseret. En lang række af andre grønlandske film vil blive digitaliseret.

Isiginnaagassiat assigiinngitsorpassuit assigiinngitsunik sammisaqartut naalagaaffeqatigiinnerup iluani tamanit takuneqariaannanngussapput. Isiginnaagassiat digitalisererneqassapput, takunnikkusuttunit nassaarineqariaannanngussallutik.

Det Danske Filminstitut tusagassiutinut nalunaarummini taama ilisimatitsivoq.

- Det Danske Filminstitut, Arktisk Institut aamma Kalaallit Nunaata allagaateqarfia suleqatigiinnissamik qangali kissaateqartarsimapput, suliniummilu tamanna maanna piviusunngorsinnaalerpoq. Isiginnaagassiat europamut nunarsuarmullu tamarmut tunngatillugu soqutiginaatilerujussuupput, pingaartumik silap pissusia nunallu iluani politikki eqqarsaatigalugu. Suliniummi isiginnaagassiat Kalaallit Nunaannit kingornutassatut eriagisassatut pigineqalernissaannut aamma periarfissiivoq, Det Danske Filminstitutimi katersugaasivimmi pisortaq, Thomas C. Christensen oqarpoq.

Pinngortitaq kultoorilu pillugit isiginnaagassiat

Isiginnaagassiat katersorneqarsimasut pinngortitamut kultoorimullu, inuiaqatigiit aaqqissugaanerannut tunngasunut, nutaanerusunullu socialrealismetut sulianut immikkoortiterneqarsimapput. Pinngortitami immiussat piorsarsimassuserlu pillugu immiussat pigineqarput. Immiussani taakkunani takuneqarsinnaapput pinngortitaq piorsarsimassuserlu nunarsuarmi silaannaap kissakkiartornerata kingunerisaanik maanna allanngorsimanngikkunik piujunnaarsimasut.

Immiussat piviusulersaarutit, takornariaqarneq pillugu immiussat, paasititsiniaarnerit ukiunilu 1930-ikkunniit 1970-ikkut tungaannut namminneq immiussat aamma digitalisererneqassapput nittartakkamullu ilineqarlutik. Immiussani takuneqarsinnaapput Kalaallit Nunaata namminersorneruleriartorneranut aqqutaa kiisalu Kalaallit Nunaanni inuussutissarsiorneq.

Isiginnaagassiat kingornussassat

Isiginnaagassiat digitalisererneqareerpata nutserneqassapput Kalaallit Nunaannilu siammarneqassallutik. Det Danske Filminstitutip tusagassiutinut nalunaarummini ilisimatitsissutigaa isiginnaagassianik digitalinngorsaanerup Kalaallit Nunaanni isiginnaagassianik kingornussaqarsinnaaneq qulakkiissagaa.

Isiginnaagassiat takinerusut naannerusullu Kalaallit Nunaannut Issittumullu Avannarlermut tunngasut arlallit takuneqarsinnaalereerput, taakku uani takusinnaavatit.

Powered by Labrador CMS