Isiginnaagassiaq angalanermi ornigarneqarluartoq
Isiginnaagassiap Ronja Piiaasup paniata nunatsinni isiginnaartitsissutigineqaqattaarnera naammasseqqammerpoq. Isiginnaagassiamik isiginnaariartorpassuusimapput.
Nunatta Isiginnaartitsisarfia, Nunatsinni isiginnaartitsisunngorniarfik Islandillu Isiginnaartitsisarfia peqatigalugit isiginnaagassiamik suliaqartuupput. Nunattalu Isiginnaartitsisarfia tusagassiutinut nalunaaruteqarluni ilisimatitsivoq isiginnaagassiaq nuannarineqarluartoq.
Illoqarfinni isiginnaariarsimasut:
- Nuuk: 550
- Ilulissat: 301
- Aasiaat: 400
- Sisimiut: 424
- Maniitsoq: 218
- Angalaneq iluatsilluarsimaqaaq illoqarfinni tikitani inuppassuit isiginnaariartarsimallutik, Nunatta Isiginnaartitsisarfia tusagassiutinut nalunaarummi allappoq.
Isiginnaariartorpassuit
Ronja Piiaasup pania Nuup saniatigut illoqarfinni sisamani takutinneqarpoq. Ilulissani, Aasianni, Sisimiuni Maniitsumi isiginnaariartut 1.343-simapput. Nuummi isiginnaariartut ilanngukkaanni, isiginnaagassiaq 1.893-init isiginnaarneqareersimavoq.
- Nunarput tamakkerlugu isiginnaagassianik pisariaqartitsisoqartoq malugisinnaavarput, tassami illoqarfinni tikitatsinni isiginnaartitsinerni isissutissat tamarmik nunguttarput inillu takutitsiviusartut mikivallaalersimallutik. Taassuma malittaanik illoqarfinni assigiinngitsuneersut oqaloqatingaangut aaqqiissummik nassaarniarluta, isiginnaartitsisarfiup pisortaa, Susanne Andreasen tusagassiutinut nalunaarummi oqarpoq.
Susanne Andreasen ilisimatitsivoq illoqarfiit ataasiakkaat maanna oqaloqatigineqartut, siunissami isiginnaartitsiniarnermi illoqarfinni ataasiakkaani arlaleriarluni isiginnaartitsisarsinnaaneq anguniarlugu, maanna illoqarfik tikitaq nalinginnaasumik ataasiaannarluni isiginnaartitsissummik takutitsiffiusarpoq.
- Isiginnaagassiamik angallassilluni akisusarmat illoqarfiit nunaqarfiillu tamakkersinnaaneq ajorpagut, taamaattorli isiginnaagassianik angallassinerni nunatta sineriaai tamakkerniarsarisarpagut, Susanne Andreasen oqarpoq.