Aalborg
Isiginnaagassiami nutaami kalaallit qitiusut
Aalborg Teateri isiginnaagassiamik kalaallinik arfineq-marlunnik kalaallinik innuttaasunik qitiusumik peqataaffigineqartumik takutitseqqaalerpoq
Aalborg Teater novemberip 21-ani innuttaasunit isiginnaagassiamik nutaamik Danmarkimi takutitseqqaassaaq, kalaallit innuttaasut arfineq-marluk qitiusumik inuttaralugit.
- Upernaami isiginnaartitsisarfik kalaallinik ujaasivoq, isiginnaartitsinissamut peqataanissamut annertuumik soqutiginnittoqaqaaq, kalaallillu Aalborgimiittut ajornanni annertuumik ikiorneqarpugut. Maannakkullu innuttaasut arfineq-marluk toqqarpagut, tusagassiortunut attaveqartartoq Helle Vagner ilisimatitsivoq.
Assigiinngitsut
Peqataasut arfineq-marluk, Terkild, Agathe, Maliina, Marie, Anna, Lotte aamma Inaluk, tamarmik assigiinngitsorujussuarnik utoqqaassuseqarput, tunuliaqutaqarput aamma ilinniagaqarput. Kisianni minnerpaamik ataatsimik assigiissuteqarput; kalaallimik angajoqqaaqarput; Aalborgimi najugaqarput; kiisalu piffissami sivisuumi sivikitsumiluunniit Kalaallit Nunaanni najugaqarnikuupput.
Kalaallit aalborgimiittut
Isiginnaagassiami oqaluttuarissavaat kalaaliulluni Aalborgimiinneq. Isiginnaagassiap aamma Kalaallit Aalborgimiittut qulequtaraa.
Innuttaasunit isiginnaagassiap ilaatigut allaanerussutigaa, isiginnaagassiap allariigaannginnera, tassa isiginnaagassiornerup ingerlanerani peqataasut oqaluttuarnerisigut allanneqartarpoq.
Aalborgimi 1.300-rujut
Kalaallit Nunaanni inunngorsimasut 1.300-rujut missaaniittut Aalborgimi najugaqarput. Ilinniartuupput, suliffeqartut, utoqqalinersiallit aamma suliffeqanngitsut. Jyllandip avannaamiuupput, nunamilu Danmarkimit 50-riaammik anginerusumit aggersuullutik.
Kalaaliulluni Aalborgimi najugaqarneq qanoq ittuua? Isiginnaartitsisarfiup tamanna isiginnaagassiami akissutissarsiniarpaa.