Isertitsivinni pisinnaasat sakkortunerusumik pineqaatissiisarnissamut aporfiusut

Inatsisinik Atuutsitsinermut Naalakkersuisoq Martha Abelsen (S), pinerluutinut arlalinnut tunngatillugit sakkortunerumik pineqaatissiisalernissamik kalaallit kissaateqarnerat pillugu Danmarkimi inatsisinik atuutsitsinermut ministerimik Nick Hækkerupimik ataatsimeeqateqarsimavoq.

Abelsenip Inatsisinik atuutsitsinermut ministeri siusinnerusukkut qinnuigisimavaa, toqutsisimanerit, kinguaassiuutitigut pinerluuteqarsimanerit peqqarniitsumillu persuttaasimanerit pillugi suliani sivisunerusumik isertitsivinniititsisussanngorluni pineqaatissiissutaasartunik allannguinissamut piareersaaqullugu.

- Kissaatigineqartoq tapersersorpara, aamma Kalaallit Nunaanni innuttaasut politikkerillu kissaataat malillugit pineqaatissiissutigineqartartut allanngortinnissaat piffissanngortoq isumaqatigaara, Nick Hækkerup tusagassiorfinnut nalunaaruteqarnermi oqarpoq.

Aaqqiissutissarsiorluni sulineq aallartissimasoq

Sakkortunerusumilli pineqaatissiisoqartassappat, nunami isertitsivinni pisinnaasat unammillernassapput, Danmarkimi inatsisinik atuutsitsinermut ministeri oqarpoq:

- Sivisunerusumik isertitsivimmiititsisussanngorluni pineqaatissiissutaasartut sakkortusineqassappata pisinnaasat annertusineqartariaqassapput, tamannalu unammilligassaavoq pimoorullugu tigusassarput, Nick Hækkerup oqarpoq.

Danmarkip Kalaallit Nunaanni isertitsiviit akisussaaffiagi. Taakku Kalaallit Nunaanni Pinerluuteqarsimasunik Isumginnittoqarfimmit, Danmarkimi eqqartuussiveqarnerup ilaatut danskit akisussaaffigisaannit aningaasalersorneqartarput.

Nick Hækkerupip ilisimatitsissutigaa, kalaallit kissaataat naammassiniarlugu Inatsisinik Atuutsitsinermut Ministeeriaqarfik aaqqiissutissarsiorluni suliaqartoq.

Abelsen pitsaanerusumik sullissisoqartarnissaanik neriuuteqartoq

- Peqatigitillugu neriuutigaara, Kalaallit Nunaanni isertitsivinni nakkutilliisut aningaasarsiatigut malunnaatilimmik qaffaaffigineqarnissaannik isumaqatigiissut aqqutigalugu, isertitsivinni nakkutilliisussanik amerlanerusunik sulisussarsisinnaassalluta, isumaqatigiissutillu ataatsimoorluta anguniakkatsinnik angusaqarnissamut iluaqtuaasinnaanera neriuutigalugu, Nick Hækkerup oqarpoq.

Martha Abelsen tassunga atatillugu imatut oqarpoq:

- Aamma uanga Nick Høkkerup tigussaasumik ataatsimeeqatigineranut qujaffigerusuppara, tassani pineqaatisiissutaasartut sakkortusineqarnissaanut aporfiusinnaasunik aaqqiissuteqarniarnissarput isumaqatigiissutigaarput, Martha Abelsen oqarpoq.

Taassuma ilanngullugu oqaatigaa, sivisunerusumik pineqaatissiissalernermut ilanngullugu, pinerliisimasut isertitsivimmiinneranni pitsaanerusumik sullinneqartalernissaat neriuutigalugu.