Isertitsivimmi matoqqasumi tusarnaartitsineq siulleq
Inuk isertitsivittaami matoqqasumi siullersaalluni tusarnaartitsivoq. Misigisaq immikkuullarilluinnarpoq pikkunarlunilu, Inunnguaq Petrussen oqarpoq.
Isertitsivittaap eqaarsaartarfiani nipilersortartut Inuk appimmata nuannarineqarluarput. Matoqqasumi parnaarussat amerlanersai Herstedvesterimiinikuupput ukiorpassuarnilu kalaallinik nipilersortartunik tusarnaarsimanatik.
- Pingaaruteqarluinnarpoq avataaniit takkuttoqartarnissaa. Ulluinnaat assigiiaartorujussuusarput, taamaammat tusarnaartitsineq parnaarussanut nuannaarutaasimaqaaq, isertitsivimmi pisortaq, Peter Fomsgaard, Sermitsiaq.AG-imut taama oqarpoq.
Tusarnaartitsineq akunnermik sivisussuseqarpoq. Tusarnaartitsinerlu naammassimmat atsiortitsisoqarpoq nipilersortartullu assiliseqatigineqarlutik.
- Misigisaq uagutsinnut parnaarussanullu immikkuullarilluinnarpoq. Pissangasimaqaagut, iseratta parnaarussat takugatsigit pissanganerput tammarpoq. Oqaluttuarisaanermi ikkuppugut. Nunatsinnimi nipilersortartuni siullersaalluta isertitsivimmi matoqqasumi nipilersorpugut, nipilersortartuni erinarsortartoq Inunnguaq Petrussen oqarpoq.
Isertitsivimmi matoqqasumi kalaallit nipilersortartut aatsaavissuaq nipilersunngillat. Sume Herstedvesterimi 1996-imi nipilersornikuuvoq.
Parnaarussat Inuk tusarnaartitsinissaat aalajangerpaat. Parnaarussammi nipilersortartut tusarnaartarsimavaat nipilersuutillu nammineq isumalersortarsimallugit. Parnaarussat ilaat erinarsuut Qerisutut annertuumik isumaqartillugu Inunnguaq Petrussenimut oqaluttuarpoq.
Allanik aaqqissuusisoqartarumaarpoq
Isertitsivimmi matoqqasumi aaqqissuusat amerlanerusut aaqqissuuneqartalerumaartut, Isertitsivimmi pisortap, Peter Fomsgaardip oqaatigaa.
- Isiginnaartitsinerusinnaavoq, tusarnaartitsineq allaluunniit. Ullut tamaasaasarnavianngilaq, ilaannilu pisartussaasaaq. Ullut immaqa oqinnerulaalerput Inuk nipilersoreermalli. Taakkununnga misigisaq annertuvoq. Nipilersortartunut qujarujussuarpugut.
Isertitsivimmi matoqqasumi parnaarussat katillugit 40-pput. Qulillu immikkut paarineqaramik tusarnaartitsinermi peqataanngillat.
Inuk kisiartaalluni parnaarussanut tusarnaartitsinikuunngilaq. Inunnguaq Petrussenip oqaasii naapertorlugu Johnny Cash Metallica-lu isertitsivimmi musikvideoliornikuupput. Wille Nelson country-nik nipilersortartoq isertitsivinnut assigiinngitsunut tusarnaartitsiartortaqattaartarsimavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...