Isertitsisoq: Misigissueq nassuiaruminaappoq
Isikkamik arsaannermi nunanut allanut unammisartut FC Nordsjællandimut ippassaq marlunngornermi unammipput. Unammereernermi unammisartut marluk nunanullu allanut unammisartunut sungiusaasoq Morten Rutkjær Sermitsiaq.AG-mit oqaloqatigineqarput.
23-nik ukiulik Karsten Andersen FC Nordsjællandimut unamminermi kalaallini isertitsisuuvoq. Unamminermi kalaallit 1-4-mik ajorsarput, unammisaallu U17-ni, ataasiakkaat U19-ni kiisalu Superligami unammisartuni anisimaqqaartartunik ilaqarput.
Unammineq naammassimmat Karsten Andersen Sermitsiaq.AG-mit oqaloqatigineqarpoq.
- Isertitsilluni misigisaq nuanneqaaq, ingammik taama isiginnaartoqartigitillugu målerluni tupinnaqaaq. Misigissuseq nassuiaruminaappoq, arsaattartuuninni una misigisaq immikkuullarinnerpaajuvoq, oqarpoq.
Isiginnaartut nukissamik tunisisut
FC Nordsjællandip arsaattarfiani Right To Dream Parkimi inuit 500-600-t missaanniittut isiginnaarput, amerlanerpaartaat kalaallinut illersuillutik.
- Arsaaffipput iluartorujussuuvoq, illersuisullu uagutsinnut nukissanik tunisisorujussuullutik. Danmarkimi sungiusaatigalugu unammisaqattaarnerput ilikkagaqarnaqaaq, ineriartoqqinnissatsinnut iluaqutaassalluni. Neriuppunga aappaagu aamma unammisaqattaaqqissalluta, Karsten Andersen oqarpoq.
Ineriartoqqinneq
Unammeqattaarnerni Danmarkimi unammisartuuneq qanoq innersoq misigisimallugu unammisartoq Patrick Otiri Frederiksen oqarpoq.
- FC Nordsjællandimi unammisartut sukkasoorujussuupput, tassuuna takusinnaalerparput Danmarkimi unammisartuuneq qanoq misiginarnersoq. Unamminerput ilikkagaqarfigeqaarput. Aamma isiginnaartut nuanneqaat, attortinnaqaaq taama illersorneqartigigatta, oqaluttuarpoq.
Corona peqqutaalluni ukiuni marlunni kingullerni GM-it taamaatiinnarneqarnikuupput. Tamanna unammisartunut malunnartoq oqarpoq.
- Maanna coronaqalinnginnerani ilikkagarinikuusimasagut sungiusarnikkut unamminikkullu ilikkaqqikkiartulerpagut. Ineriartornerput maanna aallarteqqippoq, taamaattumik Danmarkimi unammisaqattaarnivut sungiusaataaqaat. Maanna angerlalerpugut futsalimilu sungiusarnerit unamminerillu aallarteqqilerput, oqarpoq, nangillunilu:
- Sungiusaqatigiinnerit pingaaruteqartorujussuupput. Unamminerni paasisinnaalerparput sumut killeqqanerluta. Arsaannikkut unammillerneqaqqammerpugut neriuppugullu aappaagu unammisaqattaaqqissinnaassalluta.
Målertoqarmat qiiaammertoq
FC Nordsjællandimut unammineq pikkunarsimasoq nunanut allanut unammisartunut sungiusaasup Morten Rutkjærip oqaatigaa.
- Tunuani illersuinermi akiuulluartorujussuuvugut. Unammisagut pikkoreqaat - taamaattumik ulluni kingullerni sungiusarnikuusagut malillugit unamminiarsaraluta. Qasujaassutsikkut unammillerneqarpugut, taamaammat unamminermi målerfigitingajaqattaarpugut, oqarpoq.
Unammisartut unamminermi takutitsilluartut oqaatigaa.
- Unamminermi isertitsinerput assut pikkunarpoq. Attortippunga, arsaattutsinnut isiginnaartutsinnullu qujamasullunga. Måleratta qiiaammerujussuarpunga. Angorusutatta tungaanut ingerlaarnerput eqqarsaatigaara, angorusutarpullu tikinnissaa upperilluinnarpara. Unamminermi ajorsarpugut, tamannali pingaartutut taasariaqanngilaq. Unammisartugut tulluusimaarutigeqaakka, Morten Rutkjær qungujulluni oqarpoq.
Piumasaqaatit
Unammisartut maanna nunatsinnut angerlalerput, sungiusaasorlu unammisartunut piumasaqaateqarsimalluni oqarpoq.
- Maanna qasujaallisassapput nukittorsarlutillu. Suliaq sivisussaaq, taamaattumik ukiuni marlunni tulliuttuni taakku ineriartortinneqassapput. Unammisartut kajumissuseqarluarlutik takutitsinikuupput, 1-imit 10-mut nalilissagukkit sungiusaqatigiinnermi 13-mik nalilerusuppakka. Aatsaat taama sungiusaqatigiilluartigaagut, Morten Rutkjær oqarpoq.