Iserit tatineqarluni inissaqartitsiniarnermut ilanngunneqarsimasoq - 20 mio. kr.-nik taarsigassarsitinneqarsimalluni

Kukkunersiuisup nalunaarusiaani atuarneqarsinnaavoq, inissiaatileqatigiiffiup politikkianut sanilliullugu inissiat akisuallaartut Iserimmit nalilerneqarsimasoq, nalunaarusiamittaaq nalilerneqarsimavoq, sanasumut inerteqqutaasumik tapiissuteqartoqarsimasinnaasoq.

Deloitte kommunimi inissaqartitsiniarnerup ingerlanneqarsimaneranik misissuereersoq, Kommuneqarfik Sermersuumi toqqorterneqarsimasut maannakkorpiaq saqqummertalerput.

Deloitte ingerlatsisimanermik misissuisimavoq, misissuisimanermillu nalunaarusiami kommunip periuserisimasai annertuumik isornartorsiorneqarlutik, periuserisimasai Sermitsiaq.AG-mit ulluni kingullerni allaaserineqaqattaarput.

Nalunaarusiami isornartorsiorneqartut ilagaat, kommunip inissiaatileqatigiiffik Iserit tatillugu namminersortup inissialiortiterneranut peqataatitsilersimanera, taamaalilluni najukkami sanasoq suliniummut tamarmiusumut aningaasaliissuteqarsinnaalersimavoq, tassa kommunimit neriorsorneqarsimagami inissialiarsuit ilaannik ataatsimik 99 millioner koruuninik akiliilluni pisiarineqassasoq.

Sanasullumi nammineerluni aalajangersimavaa, inissiarsuaq sorleq kommunimit pisiarineqassanersoq, kukkunersuisimasoq allappoqr.

Kommunimi pisortaq 20 millioner koruuninik taarsigassarsisitsinissamik neqerooruteqarsimasoq

Iserit nammineq inissialiorsinnaanerminut politikkissatullu allattorsimasaminut sanilliullugit inissiassat akisuallaartut nalilersimagamiuk, suliniummut aallaqqaammut peqataarusussimanngikkaluarpoq.

Iserit suliniummut peqataanissamut nangaassuteqarmat, taamanikkut Kommuneqarfik Sermersuumi pisortaanerusup neqeroorutigisimavaa, ingerlatseqatigiiffik 20 millioner koruuninik kommunimit akisussaassusilimmik taarsigassarsisinnaasoq.

Suliap tamatuma malitsigisaanik borgmesteri Charlotte Ludvigsen kingusinneruskkut annertuumik isornartorsiorneqarpoq, Iserimmut taarsigassarsiaritinneqartut 20 millioner koruuniusut kommunimi aningaasaqarnermut ataatsimiititaliaq peqataateqqaarnagu atsiorsimagai akuerisimagaalu saqqummiunneqarmat.

Kukkunersiuisoq Iserit namminersortutullu sanasup inissialiornera pillugit suliami kommunip iliuuserisimasai pillugit ilaatigut imatut allappoq:

- Kommunimi pisortaanerup sanasunilu pisortap kissaatigilluinnarsimavaat, sanasup sanaartukkaminik naammassinnissamut periarfissai annertusitinniarlugit, ingerlatseqatigiiffik inissiarsuit ilaannik pissarsitillugu suliniummut peqataatinneqarnissaa. Isumaqatigiissut ilusilersorneqarsimavoq, ingerlatseqatigiiffik inissiarsuarmik tunisiniartup inissiarsuit pingasuusut ilaannik ataatsimik nammineq aalajangigaanik pissarsisussanngortillugu.

Inerteqqutaasumik inuussutissarsiuteqartumut tapiissutaasinnaasoq

Ilanngullugu allassimavoq:

- Tunisiniartup illu A aamma/imaluunniit B allamut tunisinnaappagu, ingerlatseqatigiiffiup (Iserit) illu C, toqqavia 8,16 millioner koruuninik nalilik pissarsiarissavaa. Peqatigitillugu ingerlatseqatigiiffik inissanik 52-inik 91 millioner koruuninik nalilinnik sanaartornissamut tunisiniartoq isumaqatigiissuteqarnissamut pisussaaffilerneqarsimavoq.

Kommunit aningaasaqarnikkut akisussaassusilimmik iliuuseqarnissamut pisussaaffeqarput, Deloittemillu isumaqarput, matumani tamanna pisimanngitsoq. Deloittemit aamma oqaatigineqarpoq, suliaq aaqqissuunneqarsimanera tamarmi inuussutissarsiuteqartumut inerteqqutaasumik tapiissutaasimasinnaasoq:

- Isumaqatigiissutip takutippaa, kommunimi aqutsisut sanasup suliniummik naammassinninnissaanut ikiuukkusussimasupilussuit.

- Taamaalilluni suliffeqarfiup ataatsip pisortat aningaasaattannit tapiissuteqarfigineqarsimanera, inuussutissarsiuteqartumut inerteqqutaasumik tapiissutaasimasinnaavoq, Iserit A/S-imit inissiat pissarsiaritinneqarniartut niuernermi akigitinneqartunit akisunerusut nalilerneqarsimapput, ingerlatseqatigiiffilli inissianik pissarsitinneqarsimalluni.

Kommuneqarfik Sermersuumi pisortaasimasut taakku marluullutik Sermitsiaq.AG-mut ilisimatitsissutiginikuuaat, suliamut atatillugu oqaaseqarusunnatik.

Powered by Labrador CMS