Iserimmi pisortaq isornartorsiuineq pillugu: - Ajornerusumik inissinneqassanngilagut
Iserit Kommuneqarfik Sermersooq 20 millioner koruuninik akiliuteqarpat, namminersortup inissialiortiterneqaranut tapiissuteqarluni inissianik 99 millioner koruuninik pisiaqarsinnaasimavoq. Borgmesterip inissiaatileqatigiiffik tatineqarsimanersoq ilisimannginnerarpaa.
Ingerlatsisimanermik misissuisimaneq naapertorlugu, Kommuneqarfik Sermersuumi inissaqartitsiniarluni periuserineqarsimasup ingerlanneqarsimaneranik misissuisimaneq naapertorlugu, kommunip inissiaatileqatigiiffik Iserit namminersortutut sanasup suliniutaa aningaasalersorniarlugu inissialiortiterneranut peqataatilersimavaa.
Iserit tamatuma malitsigisaanik kommunimit 20 millioner koruuninik taarsigassarsitinneqarluni inissianik 99 millioner koruuninik nalilinnik pisiaqarnissamut neriorsuisimavoq.
Iserimmi pisortaanerup Torben Kortegaardip kukkunersiuisup allaaserisimasaatut pisoqarsimasoq uppernarsarpaa:
- Permagreen pisup nalaani Kissarneqqortuunnguami inissiarsuarnik arlalinnik sanaartorluni ingerlatsivoq. Permagreenip suliniutaata aningaasalersorneqarnissaa eqqarsaatigalugu, ilisimatinneqarpugut, Iserit inissiarsuit ilaannik ataatsimik pisiaqartuuppat, Permagreenip inissiarsuit ilaannik tunisaqarnissaa qulakkeerneqassasoq, Torben Kortegaard oqarpoq, nangillunilu:
Iserit inissiarsuarmik pisiaqassasoq
- Kommunimit taamaammat oqarfigineqarpugut, Iserit inissiarsuarmik pisiaqarnissaa kissaatiginartinneqartoq. Permagreen suliumminut tamarmiusumut taamaalilluni aningaasaliisinnaanngorpoq.
Torben Kortegaardip oqaatigaa, suliniut akisuallaaqimmat qularutigisimallugu, Iserilli kommunimit 20 millioner koruuninik taarsigassarsitinneqarmat, Iserit naggataatigut namminersortup suliniutaanut ilannguttariaqarsimavoq:
- Inissiarsuup pisiarisatta akia nammineq sanaartorsinnaasatsinnit qaffasinneruvoq. Taamaammat kommunimit 20 millioner koruuninik tapiiffigineqarpugut, Iserimmi pisortaaneq oqarpoq.
Kommuni Permagreenimut tapiissuteqartoq
Apeqqut: Tassa imaappa, Permagreenip suliniutaa aningaasalersorsinnaaniarlugu kommuni akileraartartut akiligaannit 20 millioner koruuninik atuisimasoq?
- Taamatut oqaatigineqarsinnaavoq, kommuni aningaasaliissuteqartussaavoq, kommunillu aningaasartuutai akileraarutit atorlugit akilerneqartarlutik, Torben Kortegaard oqarpoq, nangillunilu:
- Uanga pisortaanertut nalilersimavara, nammineq inissialiortitersinnaanitsinnit ajornerusumik inissinneqassanngitsugut. Inissiarsuaq pisiassarput nammineq aalajangersinnaagutsigut uagutsinnut assigiinnarsimavaa. Isumatusaartumik niuernikkut ingerlatsineq uagutsinnut immikkut aningaasartuutaanngippat ajoriffissaqartinngilara, taanna oqarpoq.
Deloitte ingerlatsisimanermik misissuisimasoq naapertorlugu, kommuni namminersortutut aningaasaliissuteqartartup suliniutaanut ilanngulluni tapiissuteqarsimammat, inuussutissarsiuteqartumut inerteqqutaasumik tapiissuteqartoqarsimasinnaavoq.
Inuttut iluanaarniartoqarsimanersoq ilisimanngikkaa
Sermitsiaq.AG-mit borgmesteri Charlotte Ludvigsen aperineqarsimavoq, Iserit namminersortup inissialiortiterneranut ilanngunnissamut kommunimit tatineqarsimanera pillugu qanoq isumaqarnersoq:
- Iserimmi aqutsisut siulersuisullu inissianik attartortitassanngortisassanik pisiaqarnissamik isumaqatigiissusiornissammut tatineqarsimanersut ilisimanngilara, nalunngilarali Iserit taarsigassarsitinneqarsimasoq.
Apeqqut: Kikkut Iserit inissiarsuarmik pisiaqaqqusimasinnaavaat? Kommunimi sulisuusimasinnaappat, taamatut iliuuseqarnermikkut aningaasatigut iluanaaruteqarniarsimasut?
- Oqaatigineqareersutut inuit ataasiakkaat Iserimmut pisiaqaqqusillutik tatisisimanersut ilisiamnngilara, nalunngilarali Kissarneqqortuunnguani inissiarsuarnik tallimanik sannaartortoqarnissaa, Iserillu inissiarsuit ilaannik ataatsimik - naatsorsuutigineqartumik 2025-mi - tigusinissaa pillugit isumaqatigiissuteqartoq.
- Suliami pineqartumi inuttut iluanaarniartoqarsimaneranik ilisimasaqanngilanga, Charlotte Ludvigsen allakkatigut akissuteqarluni oqarpoq.
20 millioner koruuninik taarsigassarsisitsisoqarsimaneranik suliaq 2021-mi ukiakkut saqqummiunneqarmat borgmesterimut Charlotte Ludvigsenimut ajornartorsiortitsilerpoq, aningaasaqarnermut ataatsimiititaliamut saqqummiuteqqaarnagu atsiorsimanini pissutigalugu. Ataatsimiititaliap suliaq 2021-mi decembarip qaammataani suliarivaa taarsigassarsisitsisimanerlu akuersissutigalugu.
Sermitsiaq.AG-mit Permagreenimi aqutsisut inuussutissarsiuteqartumut inerteqqutaasumik tapiissuteqartoqarsimaneranik oqartoqarsimaneranut qanoq isumaqarnersut paasiniarlugu oqaaseqartinniarneqarput.