Toqusoq

Isak Heilmann toquvoq

Nuummi ilinniarnertuunngorniarfimmi siornatigut pisortaasoq Isak Heilmann sivisuumik napparsimareerluni toqukkut qimaguppoq

Isak Heilmann inuppasuit taamatut eqqaamavaat. Timersullaqqissoq

Ilinniartitaanermi timersornermilu inuk Nunatsinni sunniuteqarsimaqisoq akornatsinniikkunnaarpoq. Tassaavoq Nuummi ilinniarnertuunngorniarfimmi siornatigut pisortaasoq Isak Heilmann 78-nik ukioqarluni pingasunngornermi eqqissisoq.

Isak Heilmann ilinniartitsisutut Hjørring Seminariumimi ilinniarsimasuuvoq kingornalu aamma Københavnip Universitetiani eskimologimut ilinniagaqarluni. Ilinniarfissuarmi ilinniartitsisuunermi kingornalu ilinniarnertuunngorniarfimmi pisortaanermi saniatigut tatigisaalluni arlalinni toqqagaasarpoq. Tamakku ilagaat oqaatsinut allannermullu ataatsimiititaliamiissimanera aamma Nunatt Katersugaasiviani siulersuini ilaasortaaneq.

Isak Heilmann timersullaqqissutut aamma ilisimaneqarpoq ukiorpassuarni sisoraatinik oqilaniunneq aamma arpanneq ingerlassimallugu. Tamatuma saniatigut Kalaallit Nunaanni Sisorartartut Kattuffianni siulittaasuusimavoq.

Isak Heilmann Maniitsumi inunngortuusoq nuleerneruvoq qimataraalu qitornani inersimasut pingasut taakkulu kinguaavi.

Powered by Labrador CMS