Ironbarkimik suliaqartut pingaarutilimmik angusaqarput

Uagutsinnut siuariarnerujussuuvoq, Ironbarkip pisortaa oqarpoq, umiarsuup saviminissamik assartuisussap ajornartorsiuteqarani Citronen Fjordimut tikinnerata kingorna.

Aatsitassarsiornermik ingerlatseqatigiiffik Ironbark Zinc Limited, Citronen Fjordimi ukiuni 30-ni piiaanissamut akuersissutaatilik, aggustip naalernerani pingaarutilimmik angusaqarpoq, aningaasaliisunut uppernarsaramiuk saviminissaq tassanngaanniit umiarsuarmik assartorneqarsinnaasoq.

Sermitsiaq allappoq.

Umiarsuaq assartuut 189 meterinik takissusilik Nunavik, issittumi angalanissamut qaffasinnerpaamik isumannaallisarneqarsimasoq, umiarsuarni assartuutini siullersaalluni Tunup sineriaa atuarlugu Citronen Fjordimut tikissimavoq. Umiarsuarli kangerlummut pulanngilaq, paavanulli piinnariarluni uterluni.

Angalaneq

– Angalaneq pinartoqarsimanngilaq, umiarsuullu ajornartorsiuteqarani aqqutaa tamaat ingerlavaa. Sumiiffinni ataasiakkaani imaq saattumik sikoqartarsimavoq, angalanerulli annersaani sikoqanngitsukkut ingerlavugut. Kangerluup paavanut piinnarpugut, kangerluk sikoqanngikkaluartoq. Pingaarnerusimavoq takutissallugu umiarsuaq isumannaatsumik tassunnarlunilu utertarsinnaasoq. Tamanna maanna uppernarsarsimavarput, Ironbarkip pisortaa Jonathan Downes, umiarsuaq tikimmat tassaniissimasoq oqaluttuarpoq.

Nunavik ingerlatseqatigiiffimmit Fednavimit pigineqarpoq, taannalu Canadami nikkelimik piiaaffimmik sullissisuuvoq, taamaasillunilu issittumi piiaaffinnik sullissinermi misilittagaqarnerpaat ilagalugu.

Allaaserineqartoq aviisimi Sermitsiami, ullumi tallimanngornermi saqqummersumi, tamakkiisumik atuarneqarsinnaavoq. Aviisi uani pisiariuk:

Powered by Labrador CMS