Ironbark Citronen Fjordimi pimoorussisoq
Citronen Fjordimi zinkimik suliniutip aallartinnissaanut aningaasaliinissat pisariaqartut Ironbarkimi aatsitassarsioqatigiinni aqutsisut nutaat qulakkiissavaat.
Septembarimi 2019-imi Michael Jardinep Jonathan Downes 2007-miilli Australiamiut ingerlatseqatigiiffiani Ironbarkimi Tunup avannaarsuani zinkimik aqerlumillu ujaasisuni pisortatut kingoraarpaa.
Aviisi Sermitsiaq taama allappoq.
Kingullertigut ingerlatseqatigiiffiup ujaasinissamut akuersissutit arfineq marluk utertippai, taakkunannga pingasut Citronenfjordimiillutik, pingasut Mestersvigimiillutik ataaserlu Washington Landimiilluni. Pisortaq nutaaq naapertorlugu utertitsinerup takutippaa ingerlatseqatigiiffiup siunissami nukini Citronen Fjordimi ingerlatseqatigiiffiup piiaanissamut akuersissuteqarfiani atorniarai.
Ujaasinissamut akuersissutinik utertitsinerup kingunerissavaa Ironbarkip ukiumut 18 million koruunininik sipaarnera. Aningaasat Citronen Fjordimi aatsitassarsiorfiup piorsarneranut atorneqarsinnaasut.
2020-mi utissasoq
Michael Jardinep aatsitassarsiornermut tunngatillugu aningaasaateqarfinni sulinermik tunuliaqutaqartup saniatigut Fred Hess aamma Ironbarkimi siulittaasutut nutaatut toqqarneqarpoq. Fred Hess aatsitassarsiorfinni imaannaanngitsuni sulinermi ukiunik 35-nik misilittagaqarpoq ilaatigut aatsitassarsioqatigiinni PanAustimi Aeon Metalsimilu pisortaanertut sulisimalluni.
– Ataatsimoorluta Kalaallit Nunaanni Citronen Fjordimi Ironbarkip pitsaalluinnartumik sulisimanerata ineriartorteqqinnissaa sammissavarput. Maanna niuerfimmi aatsitassarsioqatigiinnut mikisunut suliniutinik angisuunik piorsaasunut ilungersunartuaannartumi suliniutip inissisimanera misissortussanngorparput, Michael Jardine suliniummut aningaasaliissutissanik pisariaqartunik pissarsiniarluni ingerlatseqatigiiffimmut pilersaarusiuleruttortoq oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: