Ironbark aningaasaliisartunut takuniaasitsiniartoq
Ironbarkip aningaasaliisartunut Citronen Fjordimut aasaru angalatitsinissani pilersaarutigaa, sulili pilersaarutigineqartumut aningaasaliisussarsisinnaanissani nalorninartorsiorfigalugu aamma piiaaffiusumit piiarneqartut umiarsuarmut usilersuunneqarsinnaassanersut aamma ilungersunartorsiorfigalugu.
Australiameersup Ironbarkip aningaasaliisussat arlallit pilersaarusiorfigineqartumut Nunatta avannarpiaaniittumut Citronen Fjordimut angalanissamut qaaqquai. Naatsorsuutigineqartutut angalaneq juulimi Islandimit timmisartorluni pisussatut naatsorsuutigineqarpoq.
Aviisi Sermitsiaq taama allappoq.
Ironbark ukiut tallimanngulersut matuma siornagut Citronen Fjordimi zinkimik aqerlussamillu ukiuni 30-ni piiaanissaminut akuersissummik pissarsivoq. Aatsitassarsiortitseqatigiiffiup ingerlatsinissaminut pilersaarutaa naapertorlugu naliliisoqarpoq, saffiugassiassamik 3,3 millionit tonimik piiaasoqarsinnaasoq aamma piiaaffiusumit imerpalasunngortitamik ukiut tamaasa 380.000 tonimik umiarsuakkut assartuisoqarsinnaassasoq. Piiaaffiup atasinnaassusia ukiunut 14-inut ilimagineqarpoq, sivitsorneqarsinnaaneralu periarfissaalluni.
Ironbarkimi pisortap Michael Jardinep, Nuummi ataatsimeersuarnermi Future Greenlandimi qanittukkut peqataasup oqaatigaa, pilersaarutigineqartutut saffiugassiassaq zinki imerpalasunngortitaq umiarsuarnut marlunnut usilersuunneqartassaaq, taakku paarlakaallutik piffissami sivikitsumi qaammatip ataatsip marlulluunniit ingerlaneranni tamarmik immikkut pingasoriarlutik assartuisassallutik.
Akuersissummik amigaateqartut
Ironbarkilli Citronen Fjordimi pilersaaruteqarfiusumut umiarsuarmik tikisitsisinnaanissani suli iluatsinngilaa. Aatsitassarsiortitseqatigiiffiup saffiugassiassanik assartuut sikusiornissamut qajannaallisagaasoq Nunavik, Canadamiunit Fednavimit 2018-imi piiaaffiusussamut angalatinniarlugu attartorpaa, tamatumani aningaasaliisussanut takutinniarneqarluni aqqutigineqartartussaq assartuffigissallugu ajornanngitsuusoq. Misiliinerli ilaannakortumik iluatsinneqarpoq, tassami umiarsuaq Frederick E. Hydes Fjordip paavanut killiinnarluni utertariaqalermat.
Aviisimi Sermitsiami atuarnerusinnaavutit. Aviisi uani pissarsiariuk: