Ippeqinaqisumi arpattut
Anton M. Petersen Nuummeersoq tamaviaarnartumik Nuummiit Kapisilinnut arpannermi ajugaavoq, tassanilu 110 kilometerit pingasoriarluni arpannikkut naammassineqarput. Nivi Geisler arnani ajugaavoq.
Ajugaanermini atorpai nalunaaquttap akunneri 18-it minutsillu 29-it. Adam Wille tullersortaavoq nalunaaquttap akunneri 18-it minutsillu 41-ut atorsimallugit, Henrik Hedner pingajuuvoq atorsimallugit nalunaaquttap akunneri 19-it minutsillu qulit.
- Ulluni pingasuni arpannitsinni alianaassioqaagut. Timikkut sakkortuvoq. Ippernat suli ilungersunarnerulersippaat. Ippernaarutit atisakkat atorsinnaanngilavut arpannitsinni aallertarmata. Uunnaaleeqqat siutinut, qinngamut, qanermut ilaallu isitsinnut pulasarput. Sapinngisarpulli tamaat soqutiginngitsuusaarniaannarpagut, Anton M. Petersen oqaluttuarpoq.
Uiarterisut
Assut nuannaarutigivaa Adam Wille ullut kingulliit marluk ingiaqatigigamiuk, tamarmik siullermeerlutik aqqut taanna atoramikku. Imami misilerlaajuffigitigaat ulloq kingulleq 5 kilometerit uiarterisariaqarlutik taamalu minutserpaaluit tassani annaallugit. Taamaattooq ajugaasussatut tulliusussatullu inissisimanertik illersorpaat.
- Aqqutaani qujanartumik kooqarpoq imerfissaaleqinarani. Taamaattorli kilometerit qulit kingulliit kooqanngilaq. Timera maanna qasuvoq, kisianni iluartumik qasulluni, Anton M. Petersen oqarpoq.
Arnani Nivi Geisler ajugaavoq atorsimallugit nalunaaquttap akunneri 20-it minutsillu 57-it. Gitte Drachmann tullersortaavoq atorsimallugit nalunaaquttap akunneri 23-it minutsillu 15-it. Marie Fleischer pingajuuvoq atorsimallugit nalunaaquttap akunneri 23-it minutsillu 31-it.
Aviisi AG atuaruk – uani ataani isissutissarsigit:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
