Inuusuttut: Nunat inoqqaavisa ilisimasaat atuarfimmi ilinniagassanut ilanngunneqassapput
Arctic Leaders’ Summit novembarip 12-13-iani arfinilissaanik ingerlanneqarmat nunat inoqqaavisa inuusuttaat Rovaniemi Finlandimiittumi siullermeelutik katersuupput. Inuusuttut tassani siunnerfissamik siullermeerlutik suliaqarput, Issittumi nunat inoqqaavisa inuusuttaasa inuuniarnermi atugaasa pitsanngorsaaffigineqarnissaat kaammattuutigalugu.
Inuusuttut Arctic Leaders’ Summitimi, nunani tamalaani arfinilinni nunat inoqqaavisa inuusuttaasa kattuffiisa Issittumi Siunnersuisoqatigiinni ataavartumk peqataasartut namminneerlutik oqaaseqarsinnaanngorput.
Ataatsimeersuarnermi tassani siullermeertumik inuusuttut ataatsimeersuarnissaat aaqqissuunneqarsimavoq, inuusuttut 27-t Alaskameersut, Canadameersut, Kalaallit Nunaanneersut, Finlandimeersut, Norgemeersut, Sverigemeersut Ruslandimeersullu peqataapput ataatsimullu siunnerfeqarnissaq pillugu suleqatigiillutik.
Seqininnguaq Lynge Poulsen, Global Indigenous Youth Caucus sinnerlugu issittumi attaveqaataasoq aamma LGBT Greenlandimi aqutsisuusoq inuusuttut ataatsimeersuarneranni Kalaallit Nunaat sinnerlugu peqataaqqullugu Saami Councilimit qaaqquneqarsimavoq.
- Ataatsimeersuarneq misigisaavoq nuannerlunilu attortinnartoq. Inuusuttut uagut ataatsimoorluta Issittumi nunat inoqqaavisa inuusuttaasa ajornartorsiutigisartagaat oqaloqatigiissutigaavut. Tamanna pingaaruteqarluinnartutut isumaqarfigaara, uangummi inuusuttut siunissaannaanata ullumikkut aamma inooqataavugut, Seqininnguaq tusagassiorfinnut nalunaaruteqarnermini oqarpoq.
Siunnerfimmi inuusuttut sammisassat pingaarutillit, Issittumi inuusuttut inuuniarnermi atugaasa pitsanngorsaaffigineqarnerannut atatillugu pimoorullugit ingerlanneqartariaqartut isumaqatigiissutigaat.
Nammineq kulturerisaq ilisimaneqartariaqartoq
Sammineqartut ilaat assersuutigalugu tassaapput, inuiaqatigiinni ilinniartitaanikkullu nunat inoqqaavisa ilisimasassanik ilisimasaqannginneq, aalisarnerup Issittumi najugalinnut pingaaruteqarnera, silap allanngoriartornera tarnikkullu peqqissuunissaq pillugit oqallittoqarneranut nunat inoqqaavisa ilaatinneqartarnissaasa pingaaruteqarnera.
Seqininnguaq Lynge Poulsenip ataatsimeersuarnermi oqallittoqarnerani ilaatigut nunat inoqqaavisa ilisimasat qaqilerpai.
- Uangut inuusuttut isumaqatigiissutigaarput, nunat inoqqaavisa ilisimasaat inuiaqatigiinni pimoorunneqarnerusariaqartut aamma ilinniartitaanermut pinngitsoorani ilanngunneqartariaqartut. Inuusuttorpassuit nunat inoqqaavisut kinaassusertik kulturertillu misissunngisaannaraat nalunngilarput. Tamanna saqqummiupparput, maanna inuusuttuusugut kinguaariaallu tullissaasa atugassaat ernumanartoqartikkatsigit. Kulturerput inuiaqatigiinnit ilaquttatsinnilluunniit ilinniarfiginngikkutigu, taava sumi ilinniassagatsigu?
Seqininnguaq Lynge Poulsenip nunatsinni aqutsisut kaammattorpai, nunat inoqqaavisa ilisimasat ilinniartitaanermi pingaarnerutinneroqqullugit. Taanna isumaqarpoq, ilinniagaqarneq pingaaruteqartuusoq, taamaallaammi immitsinnut nalunngikkutta tarnikkut inuiaqatigiittullu nukittunerulersinnaavugut.
- Arlaannimmi minitaqanngikkarluani ilinniarluartoqarsinnaallunilu nunat inoqqaavisa ilisimasaat ilinniarneqarsinnaapput.
Inuusuttut oqariartuutaat saqqummiunniarlugu susassaqarfimmi oqartussat naapikkusuttupilussuuai.
- Inuusuttut ataatsimeersuarnerannit pingaarnertut oqariartuutigineqartoq nuannaalersitsivoq, inuusuttummi ataatsimoorlutik siunnerfeqarnermikkut piumassuseqarnertik aamma Issittumi suleqatigiinnermut peqataarusussuseqarnertik takutippaat, ICC Grønlandimi Præsidenti Hjalmar Dahl oqarpoq.