Inuusuttut uuliasiullaqqissut pingasut

Uulia katillugu 36,2 milliarder dollarsinik nalilik, tassa 200 milliarder koruunit missaannik (Nunatsinni innuttaasumut ataatsimut 3,5 millioner koruunit missaanniittut) - Sisimiuni GUX-imi ilinniartut Kenny Fiskerip, Nick Baggerip Niels-Christian Mathæussenillu nunap ataani uulia taama annertutigisoq nassaaraat.
Ajoraluartumik uuliasiorluni qillerisuusaarnerinnaavoq, tassani Aasianni, Nuummi Sisimiunilu ilinniarnertuunngorniarfinni ilinniartut unammimmata kina uuliamik gas-imillu annertunerpaamik nassaarsinnaanersoq.
Unammineq taaguuteqarpoq PetroChallenge, spil-ilu savalimmiuni ingerlatsiviup Simprentis-ip spil-ata anginerusup ilagaa, spil-ilu atorneqartarpoq uuliasiorluni suliffissuaqarfimmi sulisunik ilinniagaqartitsinermut.
Ullut marluk ilinniartut nunap ataa misissorpaat uuliamik gas-imillu annertunerpaamik ujarlerlutik, spil-imilu pingaartumik unammillerneqarput ilinniartut tatineqarlutik suleqatigiissinnaanerat aammalu aaqqissuussaasumik anguniagalimmillu sulisinnaassusiat, kiisalu uuliasiornermut atatillugu periutsinik paasinnillutik.
Ullut marluk ingerlareersut Kenny, Nick aamma Niels-Christian normu 2-mit uuliamik marloriaammik annertunerusumik nassaarsimapput taamaattumillu 2014-imi januaarimi Londonimi nunat tamalaaneersut finalernissaannut anngullutik, ilinniartitsisortik ilitsersuisortillu Mikkel Lund peqatigalugu.
Londonimi finalimi ilaatiguut peqataassapput Savalimmiut, Island, Danmark, Norge, Camada aamma Tuluit Nunaat, Nunarpullu nunanit peqataasunit kisiartaalluni suli ajugaanikuusimanngilaq - takoriartigu tamatumuuna tamanna allanngortissinnaaneripput, Sisimiuni GUX-ertut oqarput.
Kenny, Nick aamma Niels-Christian pilluangaaritsi, Londonimilu ingerlalluarisi.