Inuusuttut tallimat paarlaaqatigiinnissamut tapiissuteqarfigineqarput
Qeqqata Kommuniata inuuusuttut tallimat immikkut 8000 koruuninik tunivai, taamaalillutik nunami allami paarlaaqateqarlutik najugaqarallarnissamut takorluugartik piviusunngortinniassammassuk.
- Qularnaatsumik nalunngilarput arlalinnik oqaaseqarneq Kalaallit Nunaanni nalinginnaasumik ilinniarsimassutsip qaffassarnissaanut tunngavissaasoq. Taamaattumik Qeqqata kommunia inuusuttatta nunarsuarmioqataanerulernissaat aamma nunarsuarmioqatigiit oqaasiinut pikkorinnerulernissaat anguniarlutigu, aningaasanik taapiissutaasinnaasunik immikkortitsinikuuvoq. Taamaasiornitsigut neriuutigaarput siunissami inuusuttut taamatut angalasartut amerlanerulernissaat, kommuni tusagassiuutinut nalunaarummi allappoq, saqqummiullugulu:
- Qeqqata Kommunianiit inuusuttut tallimat aasaq manna Italiamut, Canadamut, USA-mut, Portugalimut Japanimullu paarlaasseqsatigiikkiartorlutik aallartuussaasut tapiiffigisinnaagatsigit nunnaarutigaarput. Taakku tamarmik immikkut 8.000 koruuninik tapiiffigineqarput.
Kultureqarnermut atuarfeqarnermullu ataatsimiititaliami siulittaasoq, Evelyn Frederiksen, aaqqiissut pillugu ima oqarpoq:
- Inuuneq misigisassarsiorfigalugu aallartikkaanni, inuunermi nunarsuarmioqataanissamut sakkussanik aallerfissaavoq. Qilanaarpugullu inuusuttut taakkua nunarsuarmioqataanermik kulturinillu allanik qaammaasimasaqarnerulersimallutik angerlarlutik inuusuttoqatiminnut oqaluttuassaasa tusarnissaannut.