Sisimiut
Inuusuttut takornariartitsinikkut tuluttut ilinniartut
Sisimiuni GUX-imi atuartut umiarsuarmi takornariartaammeersut tikilluaqquaat, tassani takornarissat qanoq kiffartuunneqartarnersut aamma oqaluunneqartarnersut ilinniarpaat.
Umiarsuaq takornariartaat Crystal Serenity 1070-inik ilaasoqartoq sisamanngornermi Sisimiunut tikippoq.
Tassani 2.B GUX-imi atuartut takornarissanik naapitsinissaminnut takornariartitsinissaminnullu piareersimapput, tassanilu Palisip Qaqqaanut pisuttuartitsipput. Atuartut takornariartitsinermik ilikkagaqarput, assersuutigalugu takornarissaq qanoq kiffartuunneqartarnersut oqaluutnneqartarnersullu.
Suleqatigiinneq tuluttut ilinniartitsisoq Anne Goul Froberg, aamma Hotel Sisimiut Arctic Incomingillu akonnanni pilersinneqarpoq.
Illoqarfimmi GUX-imi atuartut suleqatigineqarnerat tulluartoq, taanna isumaqarpoq, atuartut namminneq avatangiisiminnik ilisimasaqartinneqaramik, oqaatsitigut piginnaasatik pitsanngorsaramikkit, aamma angalanissaminnut aningaasanik katersigamik, Sisimiunilu silarsuarmi naapitsillutik.
Takornarianut misigisaq pitsaasoq
- Nunarsuup ilaata Sisimiunukartinneratigut, atuartut nammineerlutik naapitsinissaminnut sapiissuseqalerlutillu oqaatsitigut piginnaasatik pitsanngortippaat. Oqaloqatiginninneq sivikitsuinnaq inuup naleqassusaanut annertuumik allanngortitsisinnaasarpoq, Hotel Sisimiuni aamma Arctic Incomingimi pisortaq, Anette Lings oqarpoq.
Takornarissallu nuannersumik misigisaqarput, taanna oqarpoq.
- Takornarissanik oqarfigineqarluni nuannerpoq. Taakku inuusuttut nunaqavissut naapikkamikkit oqaloqatigalugillu nuannareqaat, inuiaqatigiinnullu tapiuteqalaarsinnaagamik qujamasuutigalugu, Anette Lings oqarpoq.