Inuusuttut takorluugaannut atisaliornikkut tapersiineq

Atisanik ilusilersuisartoq Louise Lynge Berthelsen aamma pinnersaasartoq Natascha Pedersen Peqaatigiiffik Meeqqat Inuunerissut suliniutaanut Sapiimmut aningaasanik katersiniarlutik suleqatigiipput

Atisanik ilusilersuisartoq Louise Lynge Berthelsen suliffeqarfiutinilu Nuuk Couture ApS aamma Natascha Pedersen, pinnersaasartutut Nataschap-itut ilisimaneqartoq suleqatigiillutik katersuiniarput.

Arnat taakku marluk sulliffeqarfiit takorloorsimasatik piviusunngortissimavaat, naak Kalaallit Nunaanni nunarsuup sinneranut avinngarusimasumi suliat taamaattut siullersaallutik aallartinniarnerinut namminartoqaraluasimaqisoq. Misilittakkatilli tunngavigalugit aallarterlaajulluni immaqalu annermik inuusuttuulluni iluatsitsissagaanni akuersaarneqarnissaq suulluunniit atorfissaqartinneqartaqisoq nalunngilaat.

Taamaammat arnat taakku marluullutik suleqatigiinniarlutik aalajanerput, Nataschap tupinnaannartumik kiinnaanik pinnersaalluni eqqumiitsulioriaasia Louisellu avittanik ilusilersortagai atorlugit arnanut angutinullu tujuuluaraliorput Peqatigiiffiup Kalaallit Meerartaasa suliniutaannut SAPIIMMUT iluaqutaasussamik, suliniut taanna Kalaallit Nunaanni inuusuttut takorluukkaminnik piviusunngortitsinissaasa tapersersornissaannik siunertaqarpoq.

Sapiik 9. aamma 10. klassini atuartunut suliniutaavoq. Taakku siunissami suliffissaminnik ilinniarnissaminnullu ajornakusoorsinnaaqisumik toqqaasussaapput. Suliffeqarfiit pulaarnerisigut, maligassiuisunit pulaarneqarnikkut inooqatigiinnikkullu sammisassat aqqutigalugit inuusuttut siunissaq pillugu takorluukkatik oqaasertalersinnaasarpaat. Sapiik aqqutigalugu aammattaaq inuusuttut akornanni ataqatigiinnerusunissaaq pilersinniarneqartarpoq, ataasiakkaarlutillu imminnut tatigilernissaat anguniarlugu taperserneqartarlutik. Tamanna atuarfimmi ilikkagassatigut pissarsinissamut sunniuteqarluartarpoq.

‘’Sapinngilagut” tassaavoq Nuuk Couturep oqaariartuutaa – tamatsinnut nukinik tunisussatut –minnerunngitsumik inuusuttunut. Tujuuluaqqat tuninerinit sinneqartoorutit tamarmik Sapiimmut suliniummi tunniunneqarssapput. Tujuuluaqqat siullermik tuniniarneqassapput Kalaallit Nunaat Tivolimi

- Neriuppugut minnerpaamik 45.000 kr suliniummut Sapiimmut iluanaarutaatissinnaajumaarlugit, Louise Lynge Berthelsen oqarpoq.

- Tamanna anguneqassappat soorunami pisariaqarpoq inuit tujuuluaqqamik pisinermikkut suliniummik tapersiinissaat, Natascha Pedersen naggasiivoq.

Sapiik 2008-mi Nuummi aallartippoq, Nunatisinnilu illoqarfinnut arlalinnut siaruarnikuuvoq. Ilulissat aamma Qaqortoq 2010-mili ilaapput, ukiumilu nutaami Maniitsoq ilanngunnikuulluni. Ukiut ingerlanerini aamma sumiiffinni suliffeqarfiit qanimnut suleqatigineqalerput, taakku suliffeqarfiit pulaarneqarnissaannut suliffimmillu misiliinissamut ammatitsillutik.

Powered by Labrador CMS