Skip to main content

Inuusuttut suliffeqarfiliorneq ilinniassavaat

Inuusuttut aallarnisaarusussusaat aningaasaateqarfiup nukittorsassuaa. Aningaasaateqarfiulli neriuutigaa ukioq manna suliniummik takussallutik.

Inuusuttut aallarnisaasut amerlanerusariaqarput. Tamanna aningaasaateqarfiup angorusuppaa, aningaasaateqarfik Namminersornerullutik Oqartussanit ukiut tamaasa 1,3 mio koruuninik tunineqartartpoq.

Pisariaqartinneqarpulli. Fonden for Entreprnørskabip februarimi misissuinerata takutippaa Nunatsinni aallarnisaasartut suli ikippallaartut.

- Pikkoriffigineqartoq malunnarpoq, aallarnisaasanerli aningaasanik annikitsuaqqanik immikkoortitsilluni inuusuttut atuartitsissutigisalersinnaangaluaraat, nalunaarusiami inerniliunneqarsimavoq.

Ilinniartitsisut ilinniarteqqinneri

Tamannalul maanna sulissutigineqarpoq. Namminersornerullutik Oqartussat aningaasanik immikkoortitsinerisigut, Fonden for Entreprenørskabi Nunatsinni immikkoortortaqalerpoq. Aallarnisaasarnerup atuartitsissutigisalernissaa anguniagaavoq.

- Iilinniartitsisut sanaartornermut sammisumik ilinniarteqqinnissaannut neqerooruteqarnissarput siullertut pissaaq, Fonden for Entreprenørskabimi pisortaq, Christian Vintergaard, Sermitsiaq.AG-mut oqarpoq.

Atuaruk: Nunatsinni aallarnisaaneq suli atugaavallaanngilaq

Ilinniartitsisunut pikkorissaaneq siulleq maajip qaammataanni ingerlanneqassaaq. Pikkorissarnerit nanginnerat augustip qaammataanni ingerlanneqassaaq. Ilinniartitsisut pikkorissarnissamut soqutiginnillutik saaffiginnissimasut 30 - 50 missaanniipput.

Ukiaru atuartitsissutigineqalissaaq

Aallarnisaasarneq ukiumi atuarfiusumi nutaami skema-mut ivertinneqarnissaa pilersaarutaavoq.

Ilinniartitaanermut Naalakkersuisoq, Doris Jakobsen (S) suliniummut neriuteqarluarpoq.

Atuaruk: Binzer: Siunissamik pilersitsiniarluta sorlatsinnut utissaagut

- Ilinniartitaanermut Naalakkersuisutut pingaartippara, ilinniarfiit sanaartornermik nutaaliornermillu immikkut sammisaqarlernissaat, Doris Jakobsen oqarpoq.

- Qularinngilara inuusuttunit atuartitseriaaseq nuannarineqarlunilu tigulluarneqassasoq.

- Amerlanerit ilikkagaqarnissaat qulakkiissavarput aammalu aallarnisaaneq atuartitseriaatsini annertusarneqassalluni.

Ukiaru Kalaallit Nunaanni Fonden for Entreprenørskabi atuarfeqarfinnut aallarnisaanermik nutaaliornermillu unammisitsissamaarpoq. Ajugaasullu Danmarkimi pissartanngorniutivinneranni peqataassapput.

Suliffeqarfiit neriuutigineqarput

Taassuma saniatigut aningaasaateqarfik inuusuttunut aallarnisaasunut annikikkaluamik aningaasaliinissamut periarfissaqarput. Tamannalu ukiaru pissaaq.

- Ukioq manna ingerlanerani suliffeqarfiliorsimasumik takorusuppugut, Christian Vintergaard oqarpoq.

Atuaruk: Inuussuttoq aallarnisaasoq politikerinut: Ilissi ajornartorsiutaavusi!

Inuusuttut suliffeqarfiutitaartartut malunnaatilimmi amerleriarsinnaasut, Christian Vintergaard ilimagaa.

Aallarnisaasarnerup atuartitseriaatsimi ilanngunneqarnerisa kingunerisarpaa suliffeqarfinnik nutaanik pilersitsinerulerneq, tamanna Danmarkimi misilittakkat takutippaat.

Aningaasaateqarfik 2010-mi aallartimmat inuusuttut aallarnisaasut 5 procentiusimapput. Maannalu 15 procentiullutik.

Atuartitsineq iluatsittoq

Nunatsinni aningaasaateqarfiup immikkoortoqalersimanera Sulisitsisuniit isumaqataaffigineqarpoq. Suliffeqarfiit nutaat pilersinneqassapput malitsigissavaat Nunatsinni aningaasaqarnikkut ineriartorneq kiisalu suliffissanik pilersitsineq.

- Aningaasaateqarfiup suliunitai inuussutissarsiornikkut ineriartortitsisinnaasoq ilimagaarput, Sulisitsisut pisortaat, Brian Buus Pedersen oqarpoq.

Inuusuttut aallarnisaasalissappata marlunnik pisoqartariaqartoq, aningaasaateqarfiup misilittagaasa takutippaa. Suliffeqarfimmik aallartitsissagaanni piumassuseqartartiaqarpoq aammalu imminut upperinissaq pingaaruteqarluinnarluni.

Atuaruk: Isornartorsiuinerup kingorna: Politikerit inuusuttoq aallarnisaasoq naapikkusuppaat

- Atuartitsineq aallartinneqaraangat inuusuttorpassuit suliffeqarfiutitaarsinnaanertik upperineq ajorpaat. Atuartitsinermilu peqataasarsimanerup takutippaa allannguuteqariarsimasoq.

Siammartipallattut

Aallartissagaannilu immikkut isiginiartakkat pingaaruteqarluinnarput.

Meeqqat aallarnisaasut allanut naleqqiullutik misileerusussusaat annertuneruvoq. Uanili atuartitsineq unammisitsinerlu inuusuttunut aallarnisaasunut iluaqutigineqarsinnaapput.

- Peqatitik suliffeqarfimmik aallartitsisimasut takugunikkit, misileerusunnissamut piumassusaat qaffassaaq, Christian Vintergaard oqarpoq.

Iliuuseqarneq ukiut ingerlanerini sunniuteqarumaarpoq taamaammat aningaasaateqarfiup aningaasaliissutigisinnaasai killeqartut malugeqquneqarpoq.

- Tusagassiuuteqarfiit inuusuttumik aallarnisaasumik oqaluttuaraangata, allat aamma aallarnisaalersartut, Christian Vintergaardip oqaatigaa.

Kalaallit Nunaanni Fonden for Entreprenørskabi siulittaasunik pilersitsiliivippoq, piffimmilu aqutsisoqarnissaa aamma anguniangaalluni.

Namminersornerullutik Oqartussat aningaasaliissutigisartangaasa 1,3 mio koruunit saniatigut suliffeqarfinnut aningaasaateqarfinnullu aningaasaliisussarsiorneq anguniakkat ilagivaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER