Inuusuttut sisamat IBU Junior Cup-imut ooqattaasarnermi sisorariartinneqalersut
Kalaallit inuusuttut sisamat ooqataasarlutik sisortartut International Biathlon Unions junior Cup-imut peqataajartorlugik decembarip aallartinnerani Italiamukassapput.
18-inik ukiulik Max Kreutzmann, 16-inik ukiullit Inuk Slettemark aamma Sasja Hendriksen Joelsen kiisalu 15-inik ukiulik Marika Magnussen decembarimi IBU Junior Cup-imut peqataasussatut toqqarneqarsimapput.
Inuusuttut taakku sisamat Italiami decembarip tallimaaniit aqqaneq-aappaannut unammersuartoqarnissaanut maanna sungiusaleruttorput.
- IBu junior cup-imut peqataatitsiniarnermi siunertarineqarpoq, kalaallit inuusuttut ooqattaasarlutik sisorartartut qanoq pitsaatiginerisa paasineqarnissaa. Ooqattaasarlunilu sisorarnermi unammersuartoqartarneranik misilittagaqalernissaat aamma tassani anguniagaavoq, sungiusaasuat Martin Møller oqaluttuarpoq.
Inuusuttut IBU Junior Cup-imi sprintimut aamma 5 kilometerini sukkaniuunnermut peqataassasut, sungiusaasoq ilisimatitsivoq.
Nunatsinnit ooqattaasarluni sisorartartut siuarsaaffigineqartut
Grønlands Biathlon Forbundimit ooqattaasartakkanik Nuummi inuusuttut ooqattaasarlunik sisorarnerminni atorsinnaasaannik pisiaqartoqarsimavoq, Kalaallit Nunaanni ooqattaasarluni sisorartarneq ineriartortissinnaaniarlugu. Inuusuttut ooqattaasarlutik sisorartartut siusinnerusukkut nunanut allanut atuariartortariaqartarsimapput, ooqattaasarlunilu sisorarnermi piginnaaneqarnerulerniarlutik taassuminnga ilinniagaqarnissaq toqqartarlugu.
Grønlands Biathlon Forbundimit inuusuttorpassuit ooqattaasarluni sisorartarnermik soqutiginninnerat nuannaarutigineqarpoq:
- Nunatsinni inuusuttut piukkunnaateqarluartut timersuumminnik ingerlatsiniarlutik nunanut allanukanngikkaluarlutik ooqattaasarluni sisorarnermi immikkut piginnaanngorsarsinnaalerput. Nunatsinni ineriartortoqarpoq, tassani inuusuttut ooqattaasarluni sisorarnermi sungiusarlutillu unammeqatigiisinnaaleramik, Ukaleq Slettemark GBU-meersoq oqaluttuarpoq.
Sungiusarluarsimasut
Martin Mølleri Nuummi inuusuttut ooqattaasarluni sisorarnermi sapaatip akunneri tamaasa sungiusarneqartarneranni sungiusaaqataasarpoq. Taassuma Sermitsiaq.AG-mut ilisimatitsissutigaa, soqutiginnittut amerlaruttormata NSP-p klubbiata eqqaani sungiusartitsinissamut ilaannikkut inissaqartitsisoqarneq ajortoq.
Sungiusaasup oqaaatigaa, inuusuttut sisamat Italiami unammersuartoqarnissaanut peqataajartortinneqartussat kajumissuseqarluartut.
- Oqaatigerusuppara sungiusarluarsimapput. Sungiusartarnertik pimoorulluinnarlugulu ukkatarilluarsimavaat, tamanna pitsaalluinnartumik takutitsineruvoq. IBU Junior Cup-imulli peqataatitsinissaq sungiusarnertut isigaarput, tassani naatsorsuutigisatta annersaraat, inuusuttut unammersuarnermi misilittagaqarlualernissaat, Martin Møller oqarpoq.
Sasja Hendriksen Joelsen aamma Inuk Slettemark maannakkorpiaq nunani allaniippput, Max Kreutzmannili aamma Marika Magnussen Nuummi sungiusarlutik.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...