Inuusuttut qarasaasiatigut unammisarfittaalersut
Sunngiffimmi sukisaarsartarfinni sammisassaqartitsisarneq inuusuttunut naleqqussagaallutillu soqutiginartuussaaq. Tamanna tunngaviuvoq illoqarfiit pingaarnersaata kommuniani Meeqqanut Atuarfeqarnermullu Ataatsimiititami politikkerit e-sportcenterimik pilersitsiniarnerannut, inuusuttut qarasaasiatigut pinnguarnermi sungiusarfigalugulu imminnut unammiuaarfigisinnaasaannik.
Kommuneqarfik Sermersuumi Aningaasaqarnermut Ataatsimiititap juunip 25-ani ataatsimiinnermini isummerfigissavaa, kommuni qarasaasianut quliniit 13-inut amerlassusilinnut aningaasaliissuteqassanersoq, inusuuttut sunngiffimmi sukisaarsartarfinni sammisassaqartinneqartarnerat annertusiniarlugu.
- E-sportip unammissutitut akuersaarneqaleriartornera ilutigalugu, e-sportimik soqutiginninneq ukiuni kingulerni annertusiartuinnavissimavoq. Sunngiffimmi sukisaarsartarfiit neqeroorutigisartagaasa pilerinarnerulersinneqarnissaat qulakkeerniarlugu, sunngiffimmi sukisaarsartarfiit sammisassatut neqeroorutigisartagaat inuusuttunut naleqqussarlugillu soqutiginarnerulersinneqarnissaat pingaaruteqarpoq. Sunngiffimmi sukisaarsartarfinni neqeroorutigineqartartunut e-sportimi atortunik pilersitsineq, neqeroorutinik nutarterineruvoq. Tamatuma saniatigut inuusuttut qarasaasiatigut pinnguarnermik soqutigisallit, ullumikkut sukisaarsartarfinni sammisassanut soqutiginninngitsut kajumissuseqalersinnaapput, ataatsimiititap ataatsimiinnissaa sioqqullugu suliamut ilisimasallip naliliinerani, politikkerinut nassiunneqarsimasumi tamanna atuarneqarsinnaavoq.
Aningaasaliissuteqarneq
E-sportscenteri sukisaarsartarfiit neqeroorutaannut atuutereersunut aamma naammaginartumik internetsikkut attaveqaatilinnut ilanngunneqassaaq.
Qarasaasianut 13-inut aningaasaliissuteqarneq 150.000-iniit 200.000 koruuninut naleqassaaq, aningaasat taakku Peqqinnermut Susassaqartitsinermullu Immikkoortortaqarfiup missingersuutaanit pissarsiarineqassapput. Ingerlatsivimmit naatsorsuutigineqarpoq, ingerlatsinermut aserfallatsaaliinermullu aningaasartuutaasussat ukiumut 12.000 koruuniusassasut.
Aningaasaqarnermut Ataatsimiititami politikkerit inassuteqaat akuerissappassuk, inassuteqaat kommunalbestyrelsimut, inaarutaasumik aalajangiisussamut ingerlateqqinneqassaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...