Inuusuttut pinerlunniartarnerat: Inuusuttut inersimasut pissusilersortarnerannik ersersitsipput
Inuusuttut pinerlunniartarneranni ukiuni marlussunni annikilliartortoqareersimasorlu maanna kisitsit qaffakkiartoqqilersimavoq. Sooq taamaattoqarneranut ersarissumik nassuiaatissaqanngilaq – kisianni inuusuttut pissusilersoriaasii amerlanertigut inersimasunit aallaaveqartarput, MIO-mit politiinillu oqaatigineqarpoq.
Tusagassiuutinit inuusuttut pinerlunniartarneranni malunnaatilimmik appariartoqarsimanera 2018-imut atuuttoq ukiut marluk matuma siorna nuannaarutigalugu nalunaarutigineqarpoq, aviisi AG allappoq.
Taamanimiilli nuannaarneq annikilliimisimavoq, pinerluttulerinermut inatsimmik 15-iniit 17-inut ukiullit unioqqutitsisimanerannik nalunaarutit amerliartoqqilersimammata, politiit 2020-mut ukiumoortumik nalunaarusiaat Naatsorsueqqissaartarfiullu pinerlunniartarneq pillugu saqqummersitaa nutaanerpaaq naapertorlugu.
2018-immi nalunaarutigineqartut 213-inik amerlassuseqartut, ukiut marluk qaangiunneranni, 2020-mi nalunaarutigineqartut 376-inik amerlassuseqalersimapput.
Nalunaarutigineqartut amerleriarsimaneranut nassuiaatissarpassuaqartoq, Politimestereqarfimmi Pitsaaliuinermut Nalilersuinermullu immikkoortortaqarfimmi aqutsisoq, Mikkel Høej Svendsen, nalunaarpoq.
Pissutaasut ilaat tassaavoq, inuusuttut akornanni qinngasaarisarnerup ukiuni kingullerni sakkortunerulersimanera nakuuserlunilu saassussisarninnguussimanera. Ukioq manna siusinnerusukkut inuusuttut akornanni nakuusertoqarnera pillugu Nuummi innuttaasunik ataatsimiititsisoqarpoq, kisianni Mikkel Høj Svendsen naapertorlugu, taama pisoqaleriartuaarnera nuna tamakkerlugu atuuppoq.
- Inuusuttut pinerlunniartarnerisa annertusiartornera nunap annersaanut atuuppoq. Aserorterisarnerit, tillinniartarnerat nakuusertarnerillu annertunerulersimapput, aviisimut AG-imut oqarpoq.
Oqaluttuaq tamaat uani AG-imi atuaruk: