Inuusuttut pinerlunniartarnerat pinaveersaartinniarneqassasoq
Kommuni Kujalliup Kalaallillu Nunaanni Politiit ataatsimoorussamik suliniuteqarnermikkut Kujataani meeqqat inuusuttullu pinerlunniartarnerat pinaveersaartissavaat.
Kujataani inuusuttut tillinniartarnerat, aserorterisarnerat, tillittarnerat ilaatigullu annersaasarnerat qaffakkaluttuinnarsimapput.
Taamaammat Kommuni Kujalleq Kalaallillu Nunaanni Politiit ataatsimoorussaminnik suliniuteqarnermikkut pinaveersaartitsinermik ingerlataqassapput, suleqatigiinnerminnilu nunatta kujataani meeqqat inuusuttuaqqallu pinerluttarnerannik ajornartorsiuteqarnerminni imminnut pisussaaffeqatigiillutik pinaveersaartitsissapput, politiit tusagassiorfitsigut nalunaaruteqarlutik allapput.
- Meeqqat inuusuttuaqqallu pinerlunniartalertarnerat takusinnaallugu assorsuaq alianarpoq. Meeqqat inuusuttullu pillugit, innuttaasut inuiaqatigiillu pillugit kommunitut politiitullu taamatut pisoqarnera allanngortinniassallutigu akisussaaffigaarput, akisussaaffillu taanna tiguarput, Kommuni Kujallermi borgmesteri Stine Egede nalunaaruteqarnermi oqarpoq.
Angalasimasut
Suliniaqataasuussapput Qaqortumi nunap immikkoortuani politikommissær kiisalu Kommune Kujallermi kommunaldirektøri, inunnik isumaginnittoqarfimmi pisortaq atuarfeqarfimmut ingerlatsinermi pisortaq, ulluunerani paaqqinnittarfiit, kultureqarnermi sunngiffeqarnermi sulisut suliffissaqartitsiniartullu.
Taamatut suleqatigiinnissami pitsaanerpaamik paasisimasaqarnissaq inuusuttullu pinerlunniartarnerat sumiiffinni innuttaasut qanoq misigineraat qanorlu suliarisarneraat paasisaqarfiginerujumallugu sumiiffinni siunnersuisooqatigiinni ilaasortat peqatigalugit borgmesteri Stine Egede nunatta kujataani angalanikuupput.
- Sumiiffinni meeqqanik inuusuttunillu inuit ikiuukkumalluinnartut angalanermi naapinneqarput. Napitaasa ilagaat pisortani namminerlu suliffeqarfiutilinni sulisut, timersoqatigiinni nammineq kajumissutsiminnik sulisut kiisalu inuit meeqqat inuusuttuaqqallu akornanni pinaveersaartitsinermik namminneq suliniuteqartut naapinneqarput, nalunaarummi allassimavoq.
Ukiamut aallartinneqassasoq
Nunatsinni politimesteri, Bjørn Bay, naapertorlugu taamatut suliniarnerup iluatsittumik pinissaani sumiiffinni nukiit atorneqarsinnaasut oqartussallu suleqatigiinnissaat pingaartorujussuuvoq:
- Sumiiffinni najugaqartut aalajaallutik piuinnarsinnaasumillu suliaqarsinnaanerat kiisalu piffisap ingerlanerani suliaqaannarsinnaanerat sumiiffinni meeqqanut inuusuttuaqqanullu pingaaruteqartorujussuuvoq - aamma ajornartorsiut aaqqiivigineqarsorinaraluaraangalluunniit. Taamaattumik sumiiffinni inuiaqatigiit pingaaruteqarluinnartumik akisussaaffeqarnissaat aalajangiisuulluinnartarpoq, Bjørn Bay oqarpoq nangillunilu:
- Taamaattumik nunatsinni tamarmi sumiiffinni siunnersuisooqatigiit tamarmik taamatut sulinialinnginnerini atorsinnaasatsinnik suliniutitta angusaqarfiulluarnissaa misilittagaqarfigilissagippullu kissaatigaarput.
Taamatut suliniuteqarneq ukiamut aallartinneqassasoq naatsorsuutigineqarpoq.