Inuusuttut nipilersorneq, qitinneq aamma filmiliorneq ilinniarsinnaavaat
Peqatigiiffiup NIPITU & TAPA ukioq manna workshopertitsinertik ilallugu filmiliornermik soqutigisallit ilannguppaat. Filmiliortartoq nersornaaserneqartartoq Aka Hansen piviusulersaarusiornermik ilinniartitsissaaq.
Nipilersornermik aamma qitinnermik ilinniartarneq NIPITU & TAPA ukiut sisamassaannik meeqqanut inuusuttunullu nipilersornermik qitinnermillu soqutigisaqartut qaaqquaat.
Ukioq manna ilinniartitsineq filmiliornermik ilaneqarpoq, tassani filmiliortartoq nersornaasigaasimasoq Aka Hansen amerlanngitsunut filmiliornerup silarsuaanit ilinniartitsissaaq. Tassani inuusuttut 15-init 25-inut ukiullit filmiliornermik soqutigisallit ilinniartinneqassapput.
NIPITU & TAPA-p meeqqat 40-t missaanniittut 12-nit 25-nut ukiullit sapaatip-akunnerini marluunni katerisimaartillugit nipilersornermut qitinnermullu pikkorissartittarpai. Inuusuttut peqataasut misiliisalerlaajullutillu misilittagaqareertarput.
Inuusuttut nipilersortartut nipilersoqatigiinnermit immiussisarfimmi immiussinermut nipilersortartunit qulinit Nunatsinneersunit, Danmarkimeersunit, Nunavumeersuni aamma USA-meersunit ilinniartinneqassapput.
- Nipilersortartut Nunatsinneersut aamma Danmarkimeersut saniatigut ukioq manna Nunavumit, Savalimmiunit aamma USA-mit ilinniartitsisussaqarnermut nuannaarutigisorujussuuarput. Inuusuttut nipilersornermi paasisimasatik taamaalillutik annertusissavaat, nipilersortartuniillu nunanit allaneersunik isumassarsiussallutik, suliniummik ingerlatsisoq, Jakob Søvndahl Skovaa oqarpoq.
Siorna qitittartoqatigiit TAPA pilersinneqarput, taakku qitinnermik soqutigisalinnit tigulluarneqarput.
Alexander Montgomery-Andersen aamma Camilla Olsen ukiormanna qitinnermik ilinniartitsissapput.
Qitittartut taakku ukiuni arlalinni qitinnermik ilinniartitsinermillu misilittagaqarput. TAPA ukiut aapassaanik ingerlanneqassaaq.
NIPITU & TAPA kiisalu Filmworkshop ataasinngornermini juulip 9-anni nal. 10.00 GUX Qaqortumi aallartissaaq. Peqataanissamut nalunaarneq PIP-ip nittartagaatigut www.pipkultur.gl pissaaq.
NIPITU-mi ilinniartitsisut: Sylvia Cloutier, Nina Kreutzmann Jørgensen, Pilutannguaq Løvstrøm Hammeken (Small Time Giants), Fabrizio Barzanti, Laura Jensen (Atsinnermiut), Paaliit Mølgaard (Liima Inui), Andrew Collberg (Nive Nielsen and the Deer Children), Jensia Højgaard, Miccel Mohr, Troels Nordal Mørkenborg