Inuusuttut Kofoeds Skolemukartartut amerlisut
Atuarfiup pisortaa, Gujo Thorsteinsson, ernumavoq. - Inuusuttut angerlarsimaffeqaratik aallartittariaqartassanngikkaluarput.
Gujo Thorsteinsson ernumaleqqavoq. Taanna Nuummi Kofoeds Skolemi forstanderiuvoq, aviisi AG allappoq.
Nuummersut inuuniarnermikkut ajornartorsiuteqartut Kofoeds Skolemut ornigussinnaapput ingerlariaqqinnissaminnullu ikiorneqarlutik.
Angerlarsimaffeqanngitsuunerusullu ulluunerani orniguttarput. Kisianni Gujo Thorsteinsson, atuarfiup ukiut sisamat matuma siornali ammarneranit aqutsisuusimasoq, pissutsinut allanngoriartulersunut maluginiakkaminut ernumaammersimaarpoq. Tassami inuusuttut amerliartuinnartut Nuummi Kofoeds Skolemukartarlersimapput.
- Maanna inuusuttut amerliartuinnartut orniguttalerput. Ernumaammernarporlu. Taamaattoqartariaqanngilarmi. Gujolu taamaattoqarnerani kamaammerpoq, Gujo Thorsteinsson oqarpoq.
Kofoeds Skolemi allaffiani inituumi isersimaqatigaarput. Nerriviup inunnut arfinilinnut inissallip saani inissiasugut, atuarfik ulluuneranilu orniguttartut pillugit oqaluttuuppaatigut.
- Inuusuttut angerlarsimaffeqaratik aallartittariaqartassanngikkaluarput, Gujo Thorsteinsson itisuumik anersaajutigaluni oqarpoq.
Nuummi Kofoeds Skole 2016-imi januaarimi ammarpoq, atuarfimmullu orniguttartut amerlanersaat 40-nit qummut ukioqarnerusarsimapput. Taamaammat inuusuttut angerlarsimaffeqanngitsut amerliartuinnartut Kofoeds Skolemukartalernerat Gujo Thorsteinssonip ernumanartoqartippaa.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: