Inuusuttut Københavnimiinnerminni kokainimik atuilersartut

Kalaallit inuusuttut 50-it missaanniittut Københavnimi inuiaqatigiinnut akuunngingajalluinnarlutik inuupput. Inuusuttut atornerluisoqarfinniittut ukiut marluk ingerlaneranni amerliartulersimasut, isumaginninnermik suliaqartut maluginialersimavaat.

- Taakku 70 procentii akisarput Danmarkimut nuunnerminni aanngajaarniutinik atuinerulersimallutik. Tamanna assigiinngitsunik peqquteqarpoq, pingaartumilli kikkut peqatigineri apeqqutaaqataasarpoq, Mille Schiermacher Københavnimi Kalaallit Illuutaanneersoq oqaluttuarpoq.

Taanna inuusuttut atugarliortut 50-t missaanniittut pillugit misissuinermi ataqatigiissaarisuusimavoq.

Christianiami Stjerneskibetimut inuusuttut aggikulanerulertarput.

- Inuusuttut imigassamik atuisorujussuunngikkaluarput. Hashimik pujortarnerusarput, ikiaroornartunillu sakkortunerusunik atuisartut aamma allaniit tusartarparput, Jannie Getreuer Michaelsen Københavnip Kommuniata ataani Christianiami angerlarsimaffeqanngitsut pillugit suliaqartoq oqarpoq.

Sundholmimi ikiaroornartunik neqeroorfigitittarput

Christianiami kokain ajorineqarpoq, taamaammat taassuminnga ikiaroortarneq takoqqusaarutigineqarneq ajorpoq.

Sundholmilli eqqaani ikiaroornartunik sakkortunerusunik atuineq nalinginnaasuuvoq, kokainillu atugaanera sumiiffimmi ersarilluni.

Københavnimi inuusuttut atugarliortut pillugit misissuineq

Kalaallit Illuutaata Københavnimi inuusuttut atugarliortut pillugit misissuisimavoq.

- Misissuinermi pappialat apeqqutinik akisassartallit, suleqatitta suliniaqatigiiffiillu inuusuttunut naapitaminnut agguaassimavaat.

- Inuusuttut 18-it 30-llu akornanni ukiullit 43-it apeqqutinut akissuteqarsimapput. Misissuinerli qallunaatut ingerlanneqartariaqarsimammat, kalaallisuinnaq oqaaseqartut akisinnaasimanngillat.

- Misissuinerup ilaatigut takutippaa inuusuttut amerlanerit Danmarkimut nuunnerminni ingerlaannartumik atornerluinermik ajornartorsiuteqalersimasut.

- Akissuteqartut affaat angajoqqaaminni peroriartorsimanngillat. Ilaquttaminni allani peroriartorsimapput angerlarsimaffiulluunniit avataanut inissinneqarsimallutik.

- Akissuteqartuni 20-t 23-llu akornanni ukiullit 67 procentii ukiuni pingasuni sivisunermilluunniit Danmarkimi najugaqareersimapput, tassa inuusuttunnguullutilli atornerluinermik ajornartorsiuteqalertarlutik.

- Aanngajaarniutinik atuinerat Danmarkimut nuunneranni annertuserujussuarsimasarpoq.

- Nuussimanerannut pissutigitikkajunneqarpoq ilinniagaqarnissamik kissaateqarneq. Taassuma saniatigut nutaamik aallartinnissaq, ilaqutaqarneq, aappamik qimataqarsimaneq, inissaaleqineq, kinguaassiutitigullu atornerlugaasimanerup kinguneranik aallarusunneq pissutaatinneqartarput.

- Akissuteqartut pingajorarterutaat sinnerlugit aalajangersimasumik isertitaqanngillat taamaattumillu pilersornissamut tunngavissaqaratik. Aalajangersimasumik isertitaqanngitsut affaat ukioq ataaseq sinnerlugu Danmarkimeereersimasarput.

- Inuusuttut pingajorarterutaat Danmarkimut tikinniariarlutik ulloq siulleq Christianiami Sundholmimiluunniit unnuereersimasarput. Akissuteqartut affaat unnuk siulleq nalunngisaminni unnuisimasarput.

- Ukioqqortunerusut imigassamik hashimillu atuisuusartut, inuusuttut maannga nuunnerminni kokainimik heroinimik ikiaroornartunillu allanik atuinerulertarput, Jeanette Madsen, Sundholmimi Natcafémi isumaginninnermik suliaqartoq oqaluttuarpoq.

- Illoqarfimmiippata malunnanngikkaluartoq, Sundholmimi toqqaannarnerusumik ikiaroornartunik neqeroorfigineqartarput.

Natcafémi pisortap, Henrik Bollingip misigisimavaa inuusuttut Sundholmimut nalunngisaminnik alakkaaginnaraangataluunniit kokainimik neqeroorfitittarnerat.

- Inuusuttut Tivolimi kalaallit nalliuttorsiornerannut peqataasut maanngaraangata takusarparput kokainimik neqeroorfigitittartut. Taamaasiortoqartillugu kalaallit ukioqqortunerulaartut akeqqersimaarnerminnik takutitsipput, inuusuttunik illersuerusukkaluaramik. Tamassuma kingunerisaanik kokaininik tuniniaasut kalaallillu ukioqqortunerulaartut paggipput, taanna oqaluttuarpoq.

Nakuuserneq

Kokainimik atuineq nakuusernermik kinguneqakkajuppoq.

- Nakuuserneruleriartorneq malunnartarpoq, isumaqarpungalu ikiaroornartunik atuinermut tamanna attuumalluinnartuusoq. Siornatigut imigassap hashillu saniatigut allanik atuineq ajortutut isigineqartaraluarpoq, massakkut kokainimik atuineq ajortutut isigineqanngilaq. Kalaallillu inuusuttut takusartakkatta ilai kokainimik atuisuupput, Patrick Mølholm, Sundholmimi Herbergcenterimi attaveqaataasutut sulisoq oqarpoq. Herbergcenterimi angerlarsimaffeqanngitsut piffissami sivisunerusumi innisimasinnaapput. Tassanilu nakuusertarneq annertusiartortoq, Patrick Mølholmip malugisimavaa, nakuusernerlu unikaallassimavoq aatsaat pinerluuteqartut pineqaatissinneqareermata.

- Kokainip suuneranik siusinnerusukkut ilisimasaqannginnerisa kingunerisaanik sakkortuumik qisuariartalersarput nakuusernerulersarlutillu, taanna naliliivoq.

Kokain suunersoq ilisimasanngilaat

Jeanette Madsen isumaqataavoq.

- Kokain qanoq kinguneqartitsisarnersoq ilisimagunanngilaat. Ikiaroornartoq hashimit sakkortunerujussuuvoq uerisitsianerullunilu.

Kalaallit Illutaata misissuisitsineranit malunnarsivoq inuusuttut atugarliortut akornanni kokain aamma atorneqangaatsiartoq.

- Tamanna ernumanartorujussuuvoq, Kalaallit Nunaannimi atugaanngilaq, taamaammallu ilisimanngilaat ikiaroornartoq taakkununnga qanoq kinguneqartitsissanersoq. Tunillaassuutsitsisinnaavoq eqqiluitsunik atortoqanngikkaanni. Pissusilersuutaannullu aamma kingunerluuteqartarpoq, kamaqqajaaneq sakkortusaarnerulernerlu sunniutaasarmata, Mille Schiermacher oqarpoq.

Taanna isumaqarpoq inuusuttut oqaluttuunneqartariaqartut ikiaroornartup kingunipilui qanoq ingalassimatinneqarsinnaanersut.

- Ikiaroornartumik atueriaaseq nutaaq siunissami taamaaginnassappat isumassarsiatsialaagaluarpoq kalaallisut oqaasertalimmik paasititsiniaanermik suliaqartoqassasoq, ersarissarneqarluni qanoq iliortoqarsinnaanersoq ajortunik pisoqannginnerani.