Skip to main content

Inuusuttut Københavnimi angerlarsimaffeeruttartut amerliartorput

Inuusuttut Danmarkimut nuunnerminni angerlarsimaffeeruttartut ukiut marluk matuma siorna amerliartulersimapput

Kalaallit inuusuttut Københavnimut nooreernerminni angerlarsimaffeeruttartut ukiuni kingullerni amerliartorput.

- Ukiup aappaa avillugu ukiullu marluk matuma siorna maluginiartalerparput kalaallit inuusuttut Natcafémukartartut unnuisartullu amerliartulersut. Aasaanerani ukiaaneranilu taamaaginnavipput, Jeanette Madsen, Sundholmimi Natcafémi, angerlarsimaffeqanngitsut unnuiffigisinnaasaanni isumaginninnermik suliaqartoq oqarpoq.

- Aallaqqaammut eqqarsaqqaaraluarpugut aasaanerani sulinngiffeqarnermik nalaanni piffissami sivikitsumi maaniittut, kisianni tamaaniiginnarput.

Københavnimi inunnut atugarliortunut Sundholm assigiinngitsunik neqeroorutissaqartitsivoq. Natcafép ungasinngisaaniippoq Herbergcenter, angerlarsimaffeqanngitsut tassani piffissami sivisunerulaartumi innisimasinnaapput. Allanngortoqarsimaneralu tassani aamma maluginiarneqarpoq.

- Ukiumut amerlagisassaasanngikkaluarput, maannali kalaallit inuusuttut Herbergcenterimiittartut amerlangaatsiarput, Patrick Mølholm, Herbergcenterimi attaveqaataasoq oqarpoq.

Angerlarsimaffeerullutik nuuttartut

Taama ineriartortoqarnera pissutigalugu Københavnimi Kalaallit Illutaanni ajornartorsiut pillugu misissuisoqarsimavoq. Misissuinermi kalaallit inuusuttut atugarliortut 43-t apersorneqarsimapput. Kalaallilli inuusuttut tamakkerlugit oqaloqatigineqarsimanngimmata, naatsorsuutigineqarpoq 50-t sinneqassasut.

Nuuttut amerlanerpaartaat Danmarkimukartarput inissaminnik qulakkeerisimanatik. Nuussimasut pingajorarterutaat tikinniariarlutik ulloq siulleq Sundholmimi Christianiamiluunniit unnuereertarput.

- Oqaloqatigigaangakkit oqaluttuartarput kalaallinit maani ilisarisimasaminnit oqarfigitissimasartut: Maanngarniarit, taava ikiorsiissutinik pisartagaqalissaatit inissarnillu tunineqarlutit, Jeanette Madsen oqarpoq.

- Kalaallit Nunaanni ajornartorsiutitik oqaluttuarigaangamikkit oqartarput Nuummi ilinniakkaminnik unitsitsisimallutik, angerlarsimaffissaqarsimanatik pissakilliortarlutillu.

Kalaallit Nunaanni ikiortissaaleqisut

Danmarkimulli nuukkaagamik imigassamik ikiaroornartumilluunniit atornerluerujussualertarnerat ajornartorsiutaavoq.

- Inuusuttut Kalaallit Nunaanniinnerminni ikiortissaaleqisimallutik oqaluttuaraluarpataluunniit, taamaattoq uanga isigisanni maanga nuunnerat aamma ilutsitsineruallaarneq ajorpoq, Patrick Mølholm naliliivoq.

Christianiami aamma inuusuttut ajornartorsiorujussualertarnerat takuneqartarpoq.

- Inuusuttut Danmarkimut nuunniapallattartut oqarfigerusuppakka: Aalajangertigasi eqqarsarluaqqaaritsi piareersarluaqqaaritsilu. Ajornerpaat pisarput pilersaaruteqarani najugassaqaranilu nuukkaanni. Inissaaleqineq ajornartorsiutaanerpaavoq, inissaqanngikkaannimi suna tamarmi aamma ajorluinnartarpoq, Jannie Getreuer Michaelsen Københavnip Kommuneata ataani Christianiami angerlarsimaffeqanngitsut pillugit suliaqartoq oqarpoq.

Mille Schiermacher Københavnimi Kalaallit Illutaanni inuusuttut atugaat pillugit misissuinermi ataqatigiissarisuuvoq. Inissaqannginneq ajornartorsiuterpassuarnik malitseqartartoq pillugu taanna isumaqataavoq.

- Aalajaginnginnerminni qanoq toqqaasimanertik pillugu piviusunik paasissutissinneqartarnissartik pisariaqartippaat. Kissaatiginarsinnaagaluarpoq Namminersorlutik Oqartussat kommuniillu suleqatigiillutik nuunniartunut paasissutissiisalernissaat, taanna oqarpoq.

- Nuunnermilu suut pissutaatinneqartartut misissorneqartariaqarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER