Inuusuttut kapitinnissaminnut tunuleriisaartut
Inuusuttut 16-iniit 17-it tungaanut ukiullit hunnorujulikkaat covid-19-imut akiuussusersorneqarniarlutik Nuummi tunuleriisaarput. Inuusuttut pissangalaartut, kiisami kapitissinnaanngornertik nuannaarutigaat.
Inuusuttunut akiuussutissamik kapoorinerit nal. 14.00 aallartippoq. Coronavirusimut akiuussutissamik kapitinnissamut inuusuttut utaqqisinnaanngitsut Sermitsiaq.AG-miit oqaloqatigaagut.
- Kapitikkusukkama, aallarsinnaanngorniassagama. Arsartarama nunanullu allanut unammigiartartussaagatta. Kamannalaarnikuuvoq, inuit ilaasa kapitikkusunngitsut taava uagut kapitikkusuttut 18-iliineqanngitsut kapiteqqusaanata. Kapitissinnaanngorluta tusarakku kapitinnissannut qilanaartorujussuanngorpunga, 17-inik ukiulik, isikkamik arsaattartoq Romeo Blidorf oqarpoq.
Ikinngutigiit Vivian Iversen Lynge aamma Kimmernaq Askegaard Olsen pissangapput.
- Aap, pissanganalaarpoq. Kisianni qujanartumik kapitileratta. Periarfissinneqarnerput nuannarivara, Vivian Iversen Lynge 17-inik ukiulik oqarpoq.
Ikinngutaa, Kimmernaq Askegaard Olsen 16-inik ukiulik pissangalaarpoq, kapitinnissamullu utaqqisinnaanngilaq.
- Utaqqikatannikuulluta kiisami periarfissinneqaratta qujanavunga. Torragivara kapitinnissatsinnut periarfissineqaratta, Kimmernaq Askegaard Olsen oqarpoq.
Kapitinneq ingerlalluartoq
Ikinngutigiit pingasut kapitereerlutik akiuussuserssuisarfimmiit anillapput. Siullermik kapitinneq ajorpallaanngitsoq taakkua oqaatigaat.
- Ajunngilaq, ajornanngitsunnguuvoq. Meqqummik kapitinnissannut pissangalaarsimavunga, kisianni ajunngilaq, 16-inik ukiulik Maluk Christoffersen oqarpoq.
- Uanga nuannaarutigivara kapitissinnaanngoratta. Danmarkimi inuusuttut kapitissinnaanngortut qangali tusarakku usoruttarlunga, kiisami uagut kapitissinnaanngoratta nuannaarutigivara, Julian Arleth oqarpoq.
Qaqortumi inuusuttut 16-iniit 17-it tungaanut ukiullit arfininngornermi juulip 24-ani kapitissapput. Aasiannilu juulip 27-ani kapoorisoqassalluni. Ullut kapooriviusussat uani takukkit.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...