Inuusuttut innarluutillit peqatigiiffiliortut
Peqatigiiffittut pilersinneqaqqammersumi KIIP-imi siulersuisunngortut piffissami aggersumi ilaasortassarsiorlutillu peqatigiiffiup oqariartuutaanik Kalaallit Nunaanni siammarteriniarput.
Peqatigiiffik nutaaq arfininngornermi novembarip 13-iani pilersinneqarpoq. Kalaallit inuusuttut innarluutillit peqatigiiffittaavat, KIIP, pilersitsiffiusumik ataatsimeersuarpoq.
- Siulersuisuni siullertut immitsinnut ilisarisimaqatigiilernissaq anguniarlugulu peqatigiiffimmi suleqatigiissinnaaneq ilinniassavarput, tamatumalu kingornatigut peqatigiiffiup anguniagai siunertaalu pillugit paasissutissanik siammarterissalluta, KIIP-imi siulittaasunngorlaaq Ellen Møller oqarpoq.
Siulittaasunngortoq Ellen Møller 30-nik ukioqarpoq Narsameersuullunilu, taanna isigiarsuttuuvoq. Aamma Kalaallit Nunaanni tappiitsut isigiarsuttullu peqatigiiffianni ISI-mi siulersuisunut ilaasortaavoq.
Katersuuttarfissaqarneq pisariaqartinneqartoq
Peqatigiiffimmit nutaamit ilisimatitsissutigineqarpoq, kalaallit inuusuttut innarluutillit katersuuttarfissaminnik amigaateqartut. Peqatigiiffimmit inuusuttut innarluutillit ataatsimoortinnissaat sulissutigineqassaaq.
Inuit innarluutillit illersuisoqarfiat Tilioq, SUMH aamma Inuusuttut Pisinnaasakillisimasut aaqqissuussaannik nunani avannarlerni inuusuttut ataatsimiisinneqarnerisa, kalaallit innarluutillit inuusuttut 13-it peqataaffigisimasaasa malitsigisaannik pilersitsiffiusumik ataatsimeersuartoqarpoq.
Ellen Møller, Norgemiup peqataasup nunaminni inuusuttut innarluutilli ingerlaartinneqarsimanerat pillugu oqaluttuaanit isumassarsitinneqarsimavoq. Siulittaasunngortoq aamma Danmarkimi inuusuttut innarluutillit kattuffiannit isumassarsitinneqarsimavoq.
- Inuusuttut assigiinngitsunik innarluutillit, tarnikkut timikkulluunniit innarluutillit tamarmik 35-t angullugit ukiullit peqatigiiffitsinni ilaasortanngornissamut tikilluaqqusaapput, aamma innarluutillit qanigisaat ilaqutaallu peqatigiiffitsinnut tapersersuinissamut tikilluaqqusaapput, Ellen Møller oqarpoq.
Siulersuisut maanna allaffissornikkut suliassat sulissutigaat, siulersuisut ilaasortat akiliuteqartarnissaat kattuffimmillu pilersitsinissaq sulissutigalugu aallartinniassammata. Peqatigiiffik inuusuttunut innarluutilinnut ataatsimoorfiusassaaq, peqatigiiffimmiillu kissaatigineqarpoq, inuiaqatigiinni innarluutillit paasineqarnerusarnissaat kiisalu innarluutillit pillugit politikkimut sunniuteqarnerusarnissaat.