Inuusuttut ilungersuuteqarlutik anguniagaqartut: Politikerit silap allanngoriartornerata aarlerinarnera pimoorutinngilaat

Nunarsuaq tamakkerlugu anguniagaqaqatigiit 'Fridays for Future' ingerlaaqatigiimmata Nuummi inuusuttut politikerit tusaatikkumallugit ingerlaaqatigiipput.

Inuusuttut ingerlaaqatigiittut siulliit New Zealandimi Australiamilu ingerlaaqatigiipput. Nunarsuarmilu – nalunaaqutaq malillugu akunnerit nikinnerisa tulliini – inuusuttut nunani 110-neersut aamma malinnillutik ingerlaaqatigiipput.

Nuummi nalunaaqutaq ullo’qeqqanut inuusuttut atuarfitsik qimallugu Inatsisartut allaffeqarfiata saavani naapipput.

- Isumaqaratta pingaaruteqartoq nunarsuup sinnerani pisumi aamma uagut peqataassasugut, siunissarpummiuna pineqartoq, Iluuna Sørensen, suliniummi aallartitseqataasoq oqarpoq.

- Kalaallit Nunaanni peqataanissarput pingaaruteqarpoq, allanngoriartortoqarnerami siulliulluta takusarparput, soorlu sermersuaq sukkanerusumik aakkiartortoq. Silap pissusiata allanngoriartornera Kalaallit Nunaanni sakkortuumik malugaarput.

Iluuna Sørensen (tv) og Line Andersen mener ikke, at politikerne tager klimakrisen alvorligt nok

Suliniummi aallartitseqataasut ilaat, Line Andersen, aalajangiisartunut ersarilluinnartumik oqariartuuteqarpoq.

- Politikerit silap pissusia pillugu politikki salliutittariaqarpaat, pisummi imaannaanngitsuupput. Qisuariarnissatsinnut sivikitsuinnarmik piffissaqarpugut, allanngoriartortoqarnerami takusinnaalereerparput, oqarpoq.

- Ajornartorsiutip annertussusaa takusinnaagatsigu, ilisimavarput siornatigornit suli annertunerujussuarmik iliuuseqartariaqarluta. Soorunami qanoq iliuuseqalereersimavugut, aammalu nunanut allanut sanilliulluta CO2-mik aniatitsinerput annikinneerarsuuvoq, silalli pissusiata allanngoriartornerani aarlerinartoq ima annertutigaaq, allaat annertunerusumik maannakkut qanoq iliuuseqalereersimasariaqarluta. Kalaallit Nunaat innuttakikkaluarpalluunniit siulliulluta takutitsisariaqarpugut, silap pissusianut politikki suliassani pingaarnernut ilanngullugu.

Nunat 196-it 2015-imi Parisimi isumaqatigiissut atsiormassut Kalaallit Nunaat peqataanngilaq. Atsioqatigiissutigineqartumi piumasaqaatit nunatta aningaasarsiorneranut unittoortitsinissaat, taamani Naalakkersuisuusut aarleqqutigivaat.

- Parisimi isumaqatigiissutigineqartumut peqataannginnerput uggoraara, isumaqatigiissut malillugu nunat tamalaat akornanni anguniarneqarpoq silap pissusiata allanngoriartornerata aarlerinarnera annikillisinniarneqassasoq, Iluuna Sørensen oqarpoq

- Soorunami suliami pissutsit assigiinngitsut eqqarsaatigineqartut ilisimavara, neriuutigaarali nunat tamalaat akornanni isumaqatigiissutigineqartunut Kalaallit Nunaat peqataanerulissasoq, minnerpaamillu ataavartitsinissamut minguinnerunissamillu siunertaqarluni sulilissasoq.

Powered by Labrador CMS