Inuusuttut Danmarkimut nuuttut: Angerlarsimaffeqanngitsunngortarneq

Inuusuttut Danmarkimut nuunneranni atornerluinerit angerlarsimaffeqannginnerillu ajornartorsiutaaleraluttuinnarput.

Inuusuttut Danmarkimut nuukkaangamik takorloortarpaat angerlarsimaffeqalissallutik ilinniagaqalissallutillu. Inuusuttut amerlasuut taamaattoq imigassamik, ikiaroornartumik atornerluisunngortarput, angerlarsimaffeeruttarlutillu. Inuusuttut taamatut atugaqartut Københavnimi Kalaallit Illuutaanni malugineqarpoq.

- Inuusuttut taamatut atugaqartut amerliartorneri malugaarput. Attaveqarfiginissaat ajornartarpoq, saaffigineqarsinnaariaannaanatik, Kalaallit Illuutaannit Mille Schiermacher oqarpoq.

Taamaattumik Kalaallit Illuttaat suleqateqarlutik inuusuttut 18-it 30-t tungaannut ukiullit misissuiffigaat. Apersorneqartuni inuusuttut aperineqartuni 43-t akissuteqarput. Taakku danskisut oqaluppiarsinnaanngillat.

Inuusuttut ajornartorsiutitik nassarlugit Danmarkimut nuuttarput. Københavnimut tikikkaangamik ajornartorsiutaat amerlisarput. Tamannalu eqquinerluttartoq misissuinerup takutippaa.

- Ikiorneqarnissamik pisariaqartitsisut allat ujartulersarpaat. Inuusuttut tikikkaangamik affaannai nalunngisami unnueqqaartartut misisssuinerup takutippaa. Sinneri angerlarsimaffeqanngitsutut inuulereertarput tikinnerminni, Mille Schiermacher oqarpoq.

Unnummi siullermi pingasorarterutaat angutit angerlarsimaffeqanngitsut inaanni Sundholmimi imaluunniit Christianiami unnuiartut misissuinerup takutippaa.

- Nuunnermi tamanna aallartinnerlunneruvoq, tassami imigassamik, ikiaroornartunik atornerluisuniilereersarput, taakkunanilu persuttaasut akornaniinneq nalinginnaasartuuvoq.

Kalaallit inuusuttaat Kalaallit Nunaanni suliffeqarsimasarput, ilaat ilinniagaqarsimasarlutik. Suliffeqalernissamik ilinniagaqalernissamilluunniit Danmarkimut nuuttarlutik amerlanerpaat misissuinermi oqarput. Pisariaqartitsinatik aamma oqaatigisarpaat.

- Tikeqqaaraangamik allatuulli imigassartortorujussuusarput. Taamaasereeraangat ammut ingerlalersarput, tamannalu peqqinnanngitsuunngilaq. Taamaattoq sooq Danmarkimut nuussimanerlutik eqqarsaatigilersarpaat.

Imigassartortut aamma ikiaroortut akornaniileraangamik allanut saaffissaaruttarput.

- Taamaattumik alloriaqqinnissaq ajornakusoortorujussuanngortarpoq. Angutimmi angerlarsimaffeqanngitsut najugaanniilluni piviusoq allaavoq, kingunerlutitsisinnaasoq.

Suliffeqalernissamik najugaqalernissamillu takorluugaq suli pigisarpaat, ilaannulli takorluugaannanngortarpoq.

- Takorluugartik angujuminaatsilertarpaat, tassami atugassarititaat imaannaaneq ajorput. Qanorluunniit neriuuteqartigigaluaraanni takorluukkatik angusinnaajunnaartarpaat, tassami angerlarsimaffeqarneq ajorput kiisalu sakkortuumik pissuseqarsinnaasut akornaniittarlutik.

Inersimasut assiginagit inuusuttut ikiorneqarnissamik kissaateqartut ikitsunnguusarput. Kalaallit Illuutaat, angerlarsimaffeqanngitsut najugaanni sulisut aamma aqqusinermi sulisut ikiuisinnaapput, taamaattoq inuusuttut attaveqarfiginissaat ajornakusoortinneqartarpoq.

- Inuusuttut Danmarkimut pigaangamik takorluugaat isasoortartut takusarparput. Inuusuttut ingerlariaqqiffissaaruttarput, tamannalu uggornartorujussuusarpoq takullugu, Mille Schiermacher oqarpoq.

Powered by Labrador CMS