isumaqatigiinniarnerit
Inuusuttut Ataqatigiit: Avissaartuunneq qimallugu suleqatigiittoqarli
- Isumaqatigiinniarnerni illuatungeriilluni aporfigisinnaasat siulliunnagit naapeqatigiiffiusinnaasut salliullugit sulisoqartariaqartoq neriuutigaarput. Isumaqatigiiffiusummi akerleriissutasuniit amerlanerusut upperigatsigu, Inuusuttut Ataqatigiinnit oqaatigineqarpoq
- Avissaartuussimanermiit suleqatigiinnermut alloriarnissaq piffissanngorpoq.
Inuusuttut Ataqatigiinni siulittaasoq Múte Bourup Egede kajumissaaruteqarpoq.
Siumup siulittaasuata Kim Kielsenip Naalakkersuisooqatigiinnissamik isumaqatigiinniarnerit ullumi aallartinnissaanut taama Inuusuttut Ataqatigiinnit oqariartuutigineqarpoq.
- Qinersinerup inernerata takutippaa aammalumi qinersisartut amerlanerpaartaasa kissaatigaat nunatta aqunneqarnerani avissaartuunneq qimallugu suleqatigiinneq pisariaqavissoq. Tassanilu pingaarluinnarpoq qinikkat ataasiakkaat partiillumi pissaaneqarusunnertik tunullugu nunarput sullittariaqaraat. Unammilligassagummi ataatsimoorluta aaqqittariaqavippagut, Múte Bourup Egede tusagassiutinut nalunaarummi allappoq.
- Suleqatigiinnissami pilliuteqarsinnaaneq ammaffigisassaavoq. Pingaarportaaq illuatungeriilluni imminut ataqqeqatigiilluni tusarnaarsinnaaneq, isummallu naapitinnissaanut piumassuseqarnissaq, Múte Bourup Egede qinersinermi 82-nit taaneqartoq oqarpoq. Inuit Ataqatigiinni sinniisussatut siullertut inissisimavoq.
Inuusuttut Ataqatigiit neriuutigaat isumaqatigiinniarnerni illuatungeriilluni aporfigisinnaasat siulliunnagit naapeqatigiiffiusinnaasut salliullugit sulisoqartariaqartoq
- Isumaqatigiiffiusummi akerleriissutasuniit amerlanerusut upperigatsigu. Avissaartuussimanermiit suleqatigiinnermut alloriarnissaq piffissanngorpoq. Aqqusinermi avissaartinniarlugu aalingersimagaanni naapiteqqinnisaanut periarfissaqarpoq. Piumassuseqartullu tamanna naammassisinnaavaat, Múte Bourup Egede oqarpoq.