Inuusuttut assammik arsaattarnerat siuariaqqittoq
Ukioq manna inuusuttut assammik arsaallutik pissartanngorniunneranni unamminerit pitsaasut arlallit Ilulissat Timersortarfianiit takutinneqareerput.
Nunatsinni inuusuttut assammik arsaattartut pitsaasumik takutitsisaleqqipput. Inuusuttut (2000-2001-2002 inuusut) pissartanngorniunneri aallartinnerani ullut marluk qaangiunneranni, Kalaallit Nunaanni Assammik Arsaattartut Kattuffia taama erseqqissaavoq.
- Piginnaanillit takutitsilluaqattaarput, aammalu qaffasissumik nuannerluinnartumik unammisaqattaarlutik, tusagassiutinut nalunaarummi taama allassimavoq.
- Arnat angutillu pissartanngorniunneranni unamminerit naligiiffiusut arlallit takutinneqarput, tamanna isiginnaarianit assut nuannaarutigineqarpoq.
Sapaammi unamminerit takutippaat suli allannguisoqarsinnaasoq. Arnani N-48 aamma SAK gruppiminni pointimik ataatsimik siuttuupput. Peqatigiiffiit taakku marluk pissartanngorniutivinnissamut anngutereerput.
Arnani NÛK ingerlaqqissanguni ataasinngornermi Norsaq HC-mut ajungaasariaqassaaq, GSS-lu SAK-mut ajorsartariaqarluni. Taama pisoqassapput unamminerni isertitaasimasut apeqqutaalissapput tassami NÛK aamma GSS tamarmik 3 pointeqalissangamik. SAK aamma GSS naligiikkaluarpata GSS-iluunniit ajungaangaluarpat taava GSS pissartanngorniutivinnissamut ingerlaqqissaaq.
Angutini aamma taama ingerlasoqarpoq. GSS ingerlaqqissanguni Norsaq HC-mut ajungaasariaqarpoq S68-ilu N-48 ajorsartariaqarluni. Taama pisoqassappat unamminerni isertitat aamma apeqqutaalissapput GSS-imi aamma S-68 unamminerat naligiiffiusimavoq. S-68 aamma N-48 naligiippata taakku ingerlaqqissapput.