Inuusuttut amerlanerit ilinnialerlutillu sulilissapput
Aappaagumut aningaasanut inatsimmi inuusuttut ukioqatigiit inuussutissarsiutissaminnik ilinniagaqarnissaannut aningaaIiisoqarpoq.
Naalakkersuisuni assigiinngitsuni politikkikkut anguniagaavoq, inuusuttut suliffeqanngitsut ilinniagaqanngitsullu ikilisinnissaat (Inuusuttut suliniuteqarfigineqartut aaqq.). Naatsorsueqqissaartarfiup kisitsisaataani 2020-meersuni inuusuttut suliffeqanngitsut ilinniagaqanngitsullu 35 procentiupput. Naalakkersuisut suliffeqarnermut nalunaarusiaani 20-29-nik ukiullit 59,9 procentii meeqqat atuarfiata saniatigut allamik ilinniakkamik naammassinnissimanngitsut qanittukkut saqqummertumi atuarneqarsinnaavoq.
Aviisi Sermitsiaq taama allappoq.
- Ukioqatigiinni amerlanerit inuussutissarsiornermi piginnaasaqalerfiusumik ilinniakkamik aallartitsillutillu naammassinnittarnissaat pingaaruteqarluinnarpoq. Naak ukiuni kingullerni 15-20-ni annertuumik siuariartoqaraluartoq, taakku naammagiinnassanngilavut. Amerlanerit ilinniarsimasuunerat aningaasaqarnikkut ineriartornermik patajaatsumik qulakkeerinninniarnermut, namminersorlutillu inuussutissarsiortut pisortallu ingerlatsiviisa pisariaqartumik sulisussaqarnissaannut qulakkeerinninnissamut pingaaruteqarluinnartuuvoq. Suliniummi tassani inuusuttut suliniuteqarfigineqartut pingaarnertut aallunneqarnissaat, suliniarnerlu inuusuttuni suliffissaaleqinerup annertunerpaaffiani pingaarnerutinneqarnissaa pisariaqarpoq, isumaqatigiissummi allassimavoq.
Aappaagumut suliniutigineqartut aningaasanut inatsimmi isumaqatigiissummi politikkikkut suliniutit taamaammat pingaarnersiorneqarpuq
- Suliniarneq immikkoortut oqartussallu akimorlugit pinissaat pisariaqarpoq. 2023-mi suliniutinik sukumiisumik aallartitsisoqarnissaa, ukiunilu siusinnerusuni nalilersuinerit suliniutit ingerlanneqareersut sunniuteqarnerat paasiumallugu malitseqartinneqarnissaat pingaaruteqartutut isigineqarpoq. Isumaqatigiissuteqartut 2023-mi sukkasuuik siuariartoqarnissaa ilimagaat, tassani immikkoortumi allanik pingaarnersiuinissaq siunertaralugu 2024-mut aningaasanut inatsisissatut siunnersuutip suliarineqarnissaanut kaammattuutit nutaat ilanngullugit.
Aviisimi Sermitsiami atuarnerusinnaavutit. Aviisi uani pisiarisinnaavat.
