Inuusuttut 1.800-t tikillugit aanngajaarniutinik atornerluisuusinnaaput
Inuusuttut 711-t aanna 1.792-it akornanniittut imigassamik imaluunniit ikiaroornartumik katsorsartarialimmik atornerluisuupput
Inuusuttut ikinnerpaamik 711-t 15-init aamma 24-t akornanni ukiullit imigassamik, hashimik imaluunniit aanngajaarniutinik allanik annertuumik atuisuugamik katsorsartariaqartut, Peqqissutsimut naalakkersuisoqarfiup missiliorpaa. Taakkuali amerlanerpaagunik 1.792-iusinnaapput.
Meeqqat inuusuttullu aanngajaarniutinik pinnguaatinillu ajornartorsiuteqartut pillugit suliniuteqarfiginissaannut pilersaarummi, Naalakkersuisut tusarniaassutigisaanni kisitsisit taakku atuarneqarsinnaapput.
Inuusuttut qasserpiaat atornerluinermut katsorsartariaqarnersut kisitsisaatigineqanngillat, taamaattumik peqqissutsimut naalakkersuisoqarfik inuusuttut qanoq amerlatigisut pineqarnersut missingiuteqarniarsarisimavoq.
Danskit inuusuttut atornerluinermik ajornartorsiuteqartut amerlassuseqarsorineqarpata, ikinnerpaamik 711-t missingiutigineqarput.
Aarlerinaatillit
Tamatumali saniatigut suliniuteqarnissamut siunnersuummi atuarneqarsinnaavoq, kalaallit meeqqat inuusuttullu annerusumik aarlerinaateqarlutik inissisimanerusartut, tamannalu inuusuttut atornerluisunngorsinnaanerannut sunniuteqarsinnaasut. Tamakku ilaat tassaapput, angajoqqaat nakuusertarnerat, angerlarsimaffimmi atornerluinermik ajornartorsiuteqarneq, piitsuuneq aamma kinguuaassiutitigut kanngutsaatsuliornerit. Taakku aarlerinaataasinnaasut katillutik quliusut Danmarkimut sanilliullugu Kalaallit Nunaanni sisamariaammik takussaanerupput.
Taakku ilanngullugit naatsorsuigaanni amerlanerpaaffissaannik missingiutigineqarpoq 1.792-iussasut (paasisat atuakkit). Amerlassusaat taakku kisitsisit marluk akornanni inissisimassasut naalakkersuisoqarfiup missingiutigaa.
Ullumikkut inuusuttunut tulluarsakkami atornerluisuunermut katsorsaasarnermik peqanngilaq. Taamaakkaluartoq 2016-imi aamma 2017-imi inuusuttut 188-it katsorsarneqarnissaminnut innersuunneqarput. Taakku inuusuttut katsorsarneqarnissaminnik pisariaqartitsisut 10 aamma 26 procentiisa missingaat.
Nutaamik suliniuteqarnikkut inuusuttunut tulluarsakkamik katsorsaanermik pilersitsisoqassaaq.