Inuusuttup namminiilivinnissamik anguniagaqartup Kim Kielsen unammillerpaa

Siumut nutaamik siulittaasortaassaaq. Kaaleeraq M. Andersen, ukioq ataaseq matuma siorna namminiilivinnissaq pillugu piviusulersaarusiamik saqqummiussigami maluginiarneqartoq taama isumaqarpoq.

Tamatuma kingorna Siumumut ilaasortanngorpoq, Kalaallit Nunaata kiffaanngissuseqarunnaarnissaanut toraagaqarluni ingerlanissaanut siunertaqarluni.

Angut inuusuttoq taanna siornatigut Siumup siulittaasuanut Kim Kielsenimut isornartorsiuinikuuvoq, kisianni maanna aggustimi ataatsimeersuartoqarnerani siulittaasumik nutaamik toqqaasoqarnissaa ammasumik piumasaraa.

- Siulittaasoq nutaaq marlunnik iliuuseqassaaq. Taassuma partii katersuutsissavaa, tamatumalu saniatiugt namminiilivinnissamut sulissuteqassaaq, Kaaleeraq M. Andersen Sermitsiaq.AG-mut oqarpoq.

Naalakkersuisuni nikittoqarnerata nipaa sakkortunerulersippaa. Naalakkersuisut siulittaasuata nammineerluni naalakkersuisuni inissitsitersinnaagai, taassuma nassuerutigaa.

Kim Kielsenip nammineq nikititerinera politikkikkut anguniagaqarnermit legonik nikititerinertut isikkoqaleraluttuinnartoq, saniatigut taanna isumaqarpoq.

Vittumut qularinnittoq
Tamatumali saniatigut siulittaasussatut qinigassanngortittutuamut, Vittus Qujaukitsumut tapersiinissaminut piareersimanngilaq.

- Aqutsisuua? Aamma partiimi katersuutsitsisinnaava? Kaaleeraq M. Andersen aperivoq.

Vittus Qujaukitsoq siulittaasunngussagaluarpat, partiip iluani illuatungeriilluni unammineq nanginneqaratariaannaasoq taanna isumaqarpoq.

- Kiinaq nutaaq pissanganassagaluarpoq - inuusuppallaanngitsoq aamma misilittagakippallaanngitsoq - kisianni siulittaasutut suli takusimanngisarput.

Kaaleeraq M. Andersen nammineerluni partiip siulersuisuunerinut qinigassanngortinniarluni isumaliuteqarpoq.