Inuusuttunut sullissivimmi sulisut soraarartut
Tasiilami inuusuttunut sullissivimmi sulisut sisamat ukiup affaani siullermi soraarsimapput, sulisuusimasullu maanna Kommuneqarfik Sermersuumut sakkortuumik isornartorsiuipput. Pisortap sullissiviup aallartinnerlunnera ajuusaarutigaa.
Kommuneqarfik Sermersooq februaarip qaammataani Tasiilami inuusuttunut sullissivimmik nutaamik pilersitsivoq. Sullissivik meeqqanut inuusuttunullu atugarliortunut angerlarsimaffissatut pilersinneqarpoq, aamma illoqarfimmi isumaginninnikkut suliassanik kivitseqataasartussatut atorneqartussaavoq.
Qitiusutulli sulisut arlallit qaammatialuit ingerlaneranni sullissivimmi sulisutut soraarsimapput, tassani Kommuneqarfik Sermersuumi aqutsisut isumaqatigineqannginnerat pissutigalugu.
Sullissivimmit soraartut ilagaat sullissivimmi forstanderi, immikkoortortami pisortaq perorsaasorlu. Taakku tamarmik isumaginninnerup iluani ilinniagarsimasuupput ukiorpassuarnilu isumaginninnermik misilittagaqartuullutik.
Tasiilami inuusuttunut sullissivik
Sullissvik 14 - 18-inik ukiulinnut ulloq unnuarlu sullissisarpoq, katillugit 8 -10-nut inissaqartitsilluni.
18 - 23-nik ukiullit sullinneqareersimasut namminersulernissaannut ulloq unnuarlu ikorfartuisarpoq, katillugit arfinilinnut inissaqartitsilluni.
12 - 18-inik ukiullit immikkkut ittumik pisariaqartitsisut ulluunerani katsorsarneqartarput.
Kiisalu inuusuttunut siunnersuisoqartarluni.
Pissarsiffik: Forstanderiusimasoq Karina Steensgaard
Forstanderiusimasup Sermitsiaq. AG-mut oqaatigaa, kommunip sullissivimmik ingerlatsinera sakkortuumik isornartorsiorneqarsimasoq.
Kommuneqarfik Sermersuumiit aqutsinerluttoqarneratigut meeqqanik ikiuiniarneq ajornartsimavoq, asulilu aningaasanik atuinerlunnerulluni, Karina Steensgaard sullissivimmi februaarimiit juunimut forstanderiusimasoq oqarpoq.
- Inuttut supajunnik saqqummiussisoqaannavissoq
Ukioq aallartittoq Tasiilamukarluni sullissivimi forstanderinngortussaagami Danmarkimi atorfini ininilu taamaatippai, atorfilli naatsorsuutigisimasaatut inngilluinnarpoq:
- Inuttut supajunnik saqqummiussisoqartarpoq, taakku inunnik allanik ikiuiniaraanni atorsinnaanngillat.
Karina Steensgaardip oqaatigaa, meeqqanik sullissinissamut piginnaasaqarnini pimoorunneqarsimanngitsoq, aamma inuusuttunut sullissivimmi sulisut aningaasarsiassaattut isumaqatigiissutaasimasut kommunimit tunniunneqarnissaat anguniarlugu ilungersortarsimanerarpoq.
Sulisoq stressilersimasoq
- Siunertaagaluarpoq taakku ilisimasarnerulernissaannik anguniagaqarnissara. Aningaasarsiassanulli tunngatillugit ajonartorsiuteqarnermut aamma inuussuttunut sullissivimmi qanoq iliortoqarsimanerata eqqortuuneranik nassuiaaniarnermut piffissap annersaa atorneqarsimavoq, Karina Steensgaard isumaginninnermi sullissisutut ukiut 25-t sinnerlugit misilittaqalik oqarpoq.
Inuusuttunut sullissivimmi sulisuusimasoq alla Sermitsiaq.AG-mut oqaluttuarpoq, sulineq paatsiveqanngitsumik ingerlasimavoq. Sulisuusimasup oqaatigaa, Kommuneqarfik Sermersuup ingerlatsiviani pissaaneqarniunneq pissutigalugu meeqqaanik sullissiniarneq akornuserneqartartoq.
Sulisoq sulinermini stressilersimavoq, oqaluttuaraalu Danmarkimi maanna suliaritilluni.
Karina Steensgaardip taamatut ingerlasoqarsimanera uggoraa:
- Illoqarfimmi inuusuttut, ilaqutariit innuttaasorpassuillu illoqarfimmi pisariaqartinneqartumik tapersersorneqarnissamik ilitsersorneqarnissamillu neriorsorneqarsimasut maanna isumagineqanngillat.
- Inuusuttut piginnaasamikkut ajunngitsumik isumagineqarnissartik sulisunillu immikkut ilisimasalinnik sulisoqarnissartik pisariaqartippaat. Inersimasut katsorsaataasumik oqaloqatiginninnissamut perorsaanermilu periutsinik immikkut aaqqissuussaasunik atuinissamut erseqqissumik sinaakkusiisinnaasut pisariaqartippaat, taanna oqarpoq.
Olsen: Suleqatigiinniarnermik ajornartorsiuteqartoqarsimavoq
Martha Lund Olsenip Sermitsiaq.Ag-mut allakkatigut akissuteqarluni oqarpoq, suleqatigiinniarnermik ajornartorsiuteqartoqarsimasoq, ajuusaarutiginerarpaalu inuusuttunut sullissivimmi sulisunik sisamanik annaasaqartoqarsimanera.
- Inuussuttunut sullissivik pilersipallanneqarsimavoq, kissaatigisatsitullu piareersarnissatsinnut piffissaqarsimannginnerput isertuussaanngilaq. Aamma isertuussaanngilaq aallartisarnermi ajornartorsiutaakulaartamat Kalaallit Nunaanni pisortani sulisut aningaasarsiassaannik tunniussiniartarneq.
- Sulisut naatsorsuutiginninnermut atatillugu pitsaanerusumik oqaloqatigineqarsimannginnerat ullumikkut ajuusaarutigaara, aallartisarnerummi pitsaanngitsumik ingerlanneqarsimanera qularutissaanngimmat, taanna oqarpoq.
Martha Lund Olsenip oqaatigaa, meeqqanik sullissiniarnermut akornutaasumik pissaaneqanittoqarsimanngitsoq:
- Suliami matumani sulianilumi allani meeqqat atugarliortut pitsaanerpaamik sullinneqarnissaat kisiisa ukkatarisimavakka. Isumaqarpunga, sulisut suliffimminnit soraarnissamut aalajangersimanerat assigiinngitsorpassuarnik pissuteqartoq, taanna oqarpoq.