Skip to main content

Inuusuttunut højskole, qaqqani meeqqeriviit qimmillu angalaannartut

Qineqqusaarnerup naammassiartornerani Kommuneqarfik Sermersuumi qinigassanngortittut namminneq ilungersuussatik saqqummiuppaat

Qineqqusaarneq partiip taaguulluarneqarnissaanut tunngaannanngilaq.

Namminerli aamma sapinngisamik taaguunneqarluarnissamut tunngalluinnarpoq, kingornalu politikkikkut sunniuneqarnermut atorneqarsinnaanera neriuutigineqartarpoq.

Kommuneqarfik Sermersuumi qinigassanngortittut pingasut namminneq ilungersuussaminnik saqqummiussaqarput.

Inuusuttunut højskole
Jens-Erik Kirkegaard (S) inuusuttunut 18-it aamma 24-t akornanni ukiulinnut 150-nut inissalimmik Nuummi inuusuttunut højskoleqalernissaa kissaatigaa. Angajoqqaajusut imigassamik ikiaroornartumilluunniit immaqa atuisuusut, inuusuttut ilaqutariinni inuuniarnikkut ajornartorsiortuni peroriartortut ikiorneqarnissaat siunertaalluni.

- Taamaammat højskole piukkunnarpoq, inuusuttut pisariaqartitsisut avatangiisinit ajortunit qimagullutik nutaamik inuuneqalersinnaaniassammata, Jens-Erik Kirkegaard tusagassiuutinut nalunaarummi allappoq.

- Inuusuttut toqqissisimanartumik sinissinnaassapput, avatangiisinit ajoqusiisunit ineriartorlutik qimagullutik, tassanngaaanniillu kollegianut ingerlaqqillutik ilinniarlutik, inuusuttunut højskole sumiiffik taannaassaaq.

Qaqqani meeqqeriviit
Nick Nielsen (IA) kommunimi qaqqani meeqqeriveqarnissaanik kissaateqarpoq, tassani pinngortitamut qaninnera atorluarneqartassalluni. 

- Kulturitoqqatsinnut aallaavitsinnut meerartatta atassuteqarnerulernissaannut periarfissatsialattut uanga tamanna isigaara: Pinngortitarsuarmik avatangiisitsinnik qaninnerusumik akulikinnerusumillu atuilersitsissaaq, politikeri IA-meersoq allappoq.

- Meeqqat ineriartortinneqarluassapput – meeqqallu nuannaartut peqqissullu inerititaat uagut iluaqutigiumaarpavut.

Kommuni qaqqani meeqqerivinnut periuseqalernissaa taassuma sulissutiginiarpaa, siullerlu aappaagu ammareersimassaaq.

Qimmit angalaannartut
Nuummi qimmit angalaannartut Randi Vestergaard Evaldsenip (D) maluginiarsimamai, amerlasuut sumiginnagaarpasillutillu perlerpasittarput.

Qimmip piginnittua uumasuutiminik paarsilluarnissaminut soorunami akisussaasoq taassuma naqissuserpaa.

Kisianni tamatuma saniatigut akisussaaffimmi tigusisinnaanngitsunut nakkutilliisussamik kommunimi sulisoqalernissaa piumasaraa.

- Atorfinittussaq inunnut uumasuutiminnik paarsinerluttunut attaveqarsinnaassaaq aamma pisariaqartillugu tamatumunnga atatillugu politiit suleqatigineqarsinnaassapput, Randi Vestergaard Evaldsen (D) ilaatigut taama siunnersuuteqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER