Inuusuttunut angerlarsimaffiup avataanut inissinneqarsimasunut ikuutit assigiissarneqassapput

Inuusuttut angerlarsimaffiup avataanut inissinneqarsimasut inersimasunngoriartuaarnermut ikaarsaariarnermi ikiorneqarsinnaanerannut neqeroorutit pillugit kommunit assigiinngitsunik paasinnittaaseqarput. Suliniuteqareernermi qanoq malitseqartitsisarnissaq pillugu Namminersorlutik Oqartussat innersuussuteqarput.

Nalunaarusiaq martsip qiteqqunnerani saqqummersoq naapertorlugu, meeqqat angerlarsimaffiup avataanut inissinneqarsimasut pillugit malitseqartitsinissamut kommunit ilaatigut tamakkiisumik isiginninnerat naammanneq ajorpoq.

- Pisariaqartitsisut tamarmik suliniuteqareernermi malitseqartitsivigineqarnissamik neqeroorfigitinneq ajortut sulianut pisortap immikkoortortamilu pisortap erseqqissaassutigaat. Tamakkiisumik isiginnissinnaannginneq pissutigalugu inuusuttut ilaat aaqqissuussaanermi puiorneqartartut sulianut pisortap aamma erseqqissaassutigaa, periusissatut pilersaarummi, isumaginninnermut naalakkersuisoqarfiup martsip qiteqqunnerani saqqummersitaani allassimavoq.

Nalunaarusiap aamma takutippaa suliniuteqareernermi malitseqartitsinerup siunertaa pillugu neqeroorutaasarneralu pillugu kommunit assigiinngitsunik isummertartut.

Inuusuttup eqqortumik ikiorneqarneratigut 23-inik ukioqalernerani nammineersinnaanissaa nalilerneqarpat suliniuteqareernermi malitseqartitsinissamik taamaallaat neqeroortoqassaaq. Innuttaasoq nammineersinnaanngitsutut nalilerneqarpat innuttaasoq inersimasunut neqeroorummut ikaarsaassaaq. Ulloq unnuarlu paaqqinnittarfimmiittoq 17,5-inik ukioqaleraangat suliniuteqareernermi malitseqartitsiviusussanngortarpoq.

Innersuussut: Ataatsimut paasinninneq aamma tamakkiisumik isiginninneq

"Inuusuttut angerlarsimaffiup avataanut inissinneqarsimasut inersimasunngoriartornermut ikaarsaariarnerannut atatillugu periusissiatut pilersaruut" isumaginninnermut naalakkersuisoqarfiup saqqummersippaa, inuusuttut inersimasunngornermut ikaarsaariarnerannut kommunip qanoq ikiuussinnaanerannut tunngatillugu innersuussuteqarluni.

Innersuussutit sisamat aajuku:

  • Suliniuteqareernermi malitseqartitsisarnermut siunertarineqartup ataatsimut paasineqarnissaa
  • Tamakkiisumik isiginninneq aalajangersimasumillu ingerlatsineq
  • Siusissukkut iliuuseqarneq
  • Suliniuteqareernermi malitseqartitsinermut immikkut ittumik ilitsersuusiorneq

Suliniuteqareernermi malitseqartitsineq kommuninit Namminersorlutillu Oqartussanit assigiimmik paasineqartalerpat, inuusuttumut angerlarsimaffiup avataanut inissinneqarsimasumut ikiuutit aamma assigiinnerulissapput. Kommunilli aamma tamakkiisumik isiginninnerulissapput, malitseqartitsisarnermut nalilersuinerit pillugit.

Naalakkersuisoqarfiup ilanngullugu inassutigaa inuusuttut siunissaq pillugu toqqissisimanerunissaat anguniarlugu, siusissukkut suliniuteqartoqartalissasoq.

Naalakkersuisoqarfiup naggataatigut nalilerpaa suliniuteqareernermi malitseqartitsineq pillugu sulisunut, ulloq unnuarlu paaqqinnittarfinnut ilaqutarsianullu, inuusuttumut pineqartumut kiisalu angajoqqaatut oqartussaassuseqartunut ilitsersuusiortoqassasoq. Ilitsersuutit isumaginninnermut aqutsisoqarfiup suliarissavai. Suliniuteqareernermi malitseqartitsinerup suuneranik, qanoq imaqarneranik sunillu neqerooruteqarneranik, ilitsersuutit imaqassapput.

Powered by Labrador CMS