Inuusuttuaraq futsal-imi nunanut allanut unammisartuni unammeqataaqataasinnaasoq
17-nik ukiulik Niklas Thustrup Johansen futsalimi nunanut allanut unammisartunut toqqagaavoq. Nunanut allanut unammisartut Kroatiami unammeqataassapput. - Nuannaartorisakka unammeqatiginissaat qilanaaraara, oqarpoq
Futsalimi nunanut allanut unammisartut Kroatiamut angalaqataasussat nunanut allanut unammisartut sungiusaasuannit René Olsenimit aamma Tekle Ghebrelulimit toqqarneqarput sisamanngormat.
Arsaattartoq Niklas Thustrup Johansen toqqagaasunut ilaavoq, taanna Nagdlunguami unammisartuuvoq.
- Toqqagaanissara naatsorsuutiginngikkaluarpara. Bruttotrupimiinnera nuannaarutigiinnaraluarlugu. Sungiusaqatigiilluarpugut, aamma nunanut allanut unammisartut sungiusaqatigiinnitsinni tapersersorluarpaannga. Toqqagaasimallunga paasigakku anaanara ingerlaannaq sianerfigaara, Sermitsiaq.AG-mut oqaluttuarpoq.
Taanna Nuummut nooqqammerpoq, GUX-imi ilinniartunngoqqammerluni.
Kuultit marluk
Danmarkimi efterskolerluni atuarpoq ukioq kingulleq, tassani Brøndby IF-ip U19-itai arsaqataaffigisarlugit. Aasaq manna pingasoriarluni Nunatsinni pissartanngorniuteqataavoq, siullermik U17-ni pissartanngoqataavoq, U19-ini sisamaattut inissipput kiisalu Nagdlunguak peqatigalugu inersimasuni pissartanngoqataalluni.
- Meeraallungali angajulliit arsaqatigerusuttuaannarnikuuakka. Maannakkut inersimasuni unammeqataalluarsinnaavunga, tassani sukkassusera atorluartarlugu, Niklas Thustrup Johansen oqarpoq.
Nuannaartorisani unammeqatigissavai
Kroatiami unammeqattaarnissat tullinnguupput.
- Soorunami angalanissatsinnut pissangavunga, unammisartummi allat pikkorissut unammisussaavagut. Taamaattoq imminut naatsorsuuteqarfiginaveersaarpunga. Kisianni unammeqataanissara neriuutigaara. Ronaldo imaluunniit Messi soqutigivallaanngilakka, nuannaartorinerusarpakka nunaqqatikka arsaatillaqqissut soorlu John Ludvig Broberg aamma Markus Jensen, taamaattumik taakku unammeqatiginissaat pissanganarpoq qilanaarnarlunilu, oqarpoq.
Sukkasuujullunilu isertitseriallaqqissoq
Nunarput sinnerlugu U19-ini Niklas Thustrup Johansen aamma unammisartuuvoq. U19-ni nunanut allanut unammisartut sungiusaasuat David Janussenip Niklas Thustrup Johansenip angutinut toqqagaanera nuannaarutigaa.
- U19-ni arsaqataasartut sisamat angutini toqqagaapput, taakkunani Niklas ilaavoq. Taanna sukkasoorujussuuvoq, tunniusimalluni, unamminissanut piareersimasarluni, isertitseriallaqqilluni kiisalu aamma uteriittorujussuulluni. Toqqagaanera pissusissamisoorluarpoq, David Janussen oqarpoq.