Inuusuttuaqqat peqatiminnut ujajaasut
15-inik ukiulik peqatiminit tikinneqarpoq ujajaaffigineqarlunilu. Pisoq Sisimiuni sapaatip unnuaani pivoq. Suliami unnerluunnneqartoq ataaseq ujajaanermi suliami allami, sapaatip akunnerani matumani aamma pisumi, aamma unnerluunneqareersimavoq.
Kalaallit Nunaanni Politiit ullaap tungaani nalunaarfigineqarput Sisimiuni ujajaasoqaqqissimasoq. Inuusuttuaraq 15-inik ukiulik peqatiminit unnuaq tikinneqarsimavoq siorasaarneqarlunilu tillinniarfigitissimalluni.
- Suliami uani inuusuttuaqqat marluk 15-it 18-illu akornanni ukioqartut pasineqarput. Pineqartuni ataaseq ujajaasoqarsimaneranik suliami siullermi, sapaatip akunnerani matumani nalunaarutigineqarsimasumi aamma pasineqarlunilu unnerluunneqareerpoq, Kalaallit Nunaanni Politiini pigaartut aqutsisuat, Søren Bendtsen oqarpoq.
Ujajaasimasut marluk ujajaaffigitittumit ilisarineqarsimapput, pisorlu politiinut sapaammi ullaap tungaani nalunaarutigineqarluni. Pigaartut pisortaat ilisimatitsivoq pasisat politiinit suli tigummigallarneqartut.
- Suliami paasiniaanitsinni ilaatillugu nalilersorneqassaaq pasisat tigummigallarneqassanersut. Taamaattoqassappat ukiukinnerat pissutigalugu immikkut ittunik tunngavissaqartariaqarpoq, Søren Bendtsen oqarpoq.
Politiit ilisimatitsipput ujajaaffigineqartup pigisai utertinneqareersimasut.