Inatsisartut
Inuusuttuaqqat atornerluinnginnissaannut siusissukkut iliuuseqartoqartarnissaa anguniarneqarpoq
Meeqqani inuusuttunilu hashimik imigassamillu atornerluinerup pinaveersaartinneqarnissaa anguniarlugu siusissukkut iliuuseqartoqartariaqartoq Agathe Fontain aamma Naaja Nathanielsen siunnersuuteqarput
- Ilisimavarput nunatsinni inuppassuit imigassamik, hashimik imaluunniit tamanit atornerluisuusut. Taamaattumik siusissukkut iliuuseqartoqartariaqarpoq.
Inatsisartuni ilaasortat Agathe Fontain (IA) aamma attaviitsoq Naaja Nathanielsen oqalinnissamut siunnersuumminni allapput.
Qularnaveeqqusiinissaq pisariaqartoq
- Uagut isumarput naapertorlugu meeqqanut inuusuttunullu atornerluinermik ajornartorsiuteqartunut katsorsaanissamut qularnaveeqqusiisariaqarpugut. Tamatumalu saniatigut meeqqat inuusuttullu katsorsarneqarnissaanni pinngitsaaliinissami ajornaqutit assigiinngitsut misissortariaqarpagut, siunnersuuteqartut tikkuaapput.
Assersuutigalugu Danmarkimi naartusut atornerluisuusullu isumaqatigiissuteqarfigineqarnissaannut periarfissiisoqarsimasoq oqaatigaat.
Katsorsaanerit
- Taamatullu iliortarnermut misilittakkat suli annikipput. Apeqqutaalissaarlu inuk suli 18-iinngitsoq taamatullu imminut suli oqartussaaffigilinngitsoq taamatut isumaqatigiissusiorfigineqarsinnaanersoq.
- Nammineq piumassuseqarneq aallaaviusariaqarpoq, taamaattorli allatut iliuuseqartoqarsinnaaneranut tunngasunik paasisaqarnissaq soqutiginarpoq, inuusuttummi imminnut qanoq atsigisumik ajoqusernermut naliliisinnaaneq ajormata, Agathe Fontain (IA) Naaja Nathanielsenilu oqarput.