»Inuusuttorpassuit annaaneqarput«

Kinguaassiuutitigut kannguttaatsuliornerit ukiorpassuarni oqallisigissallugit paquminartuutinneqartarpoq, kisianni piffissami kingullermi kanngunartuliorfigineqarsimasut arlaqartut oqaaseqallattaartalerput. Taamaattorli suli annertunerujussuarmik Naalakkersuisut tungaannit iliuuseqartoqartariaqarpoq, taamatut isumaqarput isornartorsiuisartut ilaatigut najukkani inuiaqatigiit ikittunnguit anguniarneqartariaqartut, tamaani inunnik isumaginninnikkut nakkutilliineq ajornartorsiummut tamatumunnga iliuuseqartarnissaq ajornakusoormat.

Henrik Thomsen: - Namminersulivinnissaq, aalisarneq, oqaatsit pillugit oqallinneq aamma inunnut ataasiakkaanut suliassat inuit pineruaat. Kinguaassiuutitigut kannguttaatsuliornerit eqqartornissaat paqumigaat.

Attallaanik oqorsaatinik qalipaatigissaartunik oqorsarluarsimallutik nasarluarsimallutillu meeqqat pingasut illarlutik apummi ilungersorlutik anori sakkortooq assorlugu Nuummi illoqarfiup qeqqatigut ingerlaarput.

Henrik Thomsenip tujuulumminut tungujortumut nasartalimmut talini paarlatsillugit neriniartarfimmi Cafétuami igalaanit angisuunit meeqqat isiginnaarpai, aviisi AG allappoq.

- Kisitsisitigut paasissutissat ilumoorpata ilimanartorujussuuvoq meeqqat arlaat kinguaassiuutitigut kannguttaatsuliorfigineqarsimasoq, oqarpoq quersuumillunilu.

Suli suliassarpassuaqarpoq

- Eqqarsaatigalugu tamanna alianarluinnartuuvoq. Ukiuni qulikkuutaani arlalinni kinguaassiuutitigut kannguttaatsuliortarneq inunnut ataatsimoorussamik ajoquserneqarnikkut kingunerlutsitsisuuvoq. Meeqqat tallimaagaangata ataaseq kinguaassiuutitigut kannguttaatsuliorfigineqarsimasarpoq, pingajusuugaangatalu ataaseq isumassuinikkut sumiginnagaasimasarluni, taamatut nalunaarusiaq 2020-meersoq danskit aamma kalaallit naalakkersuisuinit inniminnigaasoq takutitsivoq. 2021-mi 249-t meeqqanut 15-it inorlugit ukiulinnut kinguaassiuutitigut kannguttaatsuliorfiginnissimaneq pillugu unnerluutigineqarsimapput, kisianni isumaqartoqarpoq kisitsisit suli amerlanerujussuusut.

Ukiorpassuarni kinguaassiuutitigut kannguttaatsuliornerit inuiaqatigiinnut tunngatillugu oqallisigissallugit paquminartuutinneqartarpoq, kisianni piffissami kingullermi arlallit oqaaseqartalerput. Taakkununnga ilaatigut ilaavoq Henrik Thomsen, meeraanermini kannguttaatsuliorfigineqarsimasoq.

Taanna Killiliisamik aallarniisut ilagaat, Naalakkersuisut kinguaassiuutitigut kannguttaatsuliorfigineqartarnerup akiorniarneqarneranut pilersaarutaanut ilaasoq; suliniummut ilaatillugu inuit arfinillit kinguaassiuutitigut kannguttaatsuliorfigineqartarsimasut saqqummerput kannguttaatsuliorfigineqartarnerup oqallisigineqarnissaata paquminartutut isigineqartarnera unitsinniarlugu meeraanerminni misigisatik oqaluttuaralugit.

Kisianni suli suliassarpassuaqarpoq.

Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq:

Powered by Labrador CMS